بوڭا جوابًا: معجزاتِ قرآنيه شيمدى ذو الفقارده‌در و ذو الفقارڭ درت يوزه ياقين صحيفه‌سندن يالڭز ايكى صحيفه‌سنده اوتوز سنه أوّل مدنيتڭ قرآنه قارشى تنقيدلرينه إعتراض ايديلمز بر طرزده جواب ويريلن و اوچ أسكى رساله‌لرمده بولونان اوچ آيتڭ تفسيريدر. برى؛ تستّرِ نسوان حقّنده‌كى آيت، ايكنجيسى؛ إرثيت حقّنده {َفِلاُمِّهِ السُّدُسُ} اوچنجيسى؛ ينه إرثيت حقّنده {فَلِلذَّكَرِ مِثْلُ حَظِّ اْلاُنْثَيَيْنِ} آيتلرنده‌كى حقيقتلرڭ حكمتنى، فيلسوفلرى إلزام ايده‌جك بر صورتده ايكى صحيفه‌يى يگرمى سنه أوّل و باشقه رساله‌لرمده اوتوز سنه أوّل يازديغم حالده، بوگون يازيلمش گبى توهّميله درت يوز صحيفه ذو الفقار ياساق ايديلمه‌سنڭ يرينه او ايكى صحيفه‌يى ذو الفقاردن چيقاروب كتابمزى بزه إعاده ايتمك قانونًا حقّمزدر. ناصل بر مكتوبده ضررلى بر ايكى كلمه بولونسه؛ او كلمه‌لر قالديريلير، متباقيسنڭ نشرينه إذن ويريلير. بو قبيلدن محكمۀِ عادله‌ڭزدن بو حقّمزى ايسترز

بر آى أوّل بزه ويريلن قرق صحيفه‌لك إدّعانامه‌يى بريسى يانمه گلوب بڭا اوقومغه إمكان بولامديغندن، بوگون ١١ حزيرانده يڭى اولارق إدّعانامه‌يى بڭا اوقوديلر. بن ديڭله‌دم. گوردم كه، سزه يازديغم ايكى آى أوّل إعتراضنامه‌م، بر آيه ياقين أوّلده إعتراضنامه‌مڭ تتمّه‌سى و لاحقه‌سى، هم آنقره‌نڭ آلتى مقاماتنه هم مقامڭزه ده ويريلمش. ايشته بو إعتراضنامه، او إدّعانامه‌يى أساسيله كسييور و ردّ ايدييور. يڭيدن إدّعانامه‌يه قارشى إعتراضنامه يازمغه هيچ لزوم گورمييورم. يالڭز ايكى اوچ نقطه‌يى مقامِ إدّعايه خاطرلتمق نوعندن ديرم كه

بن إدّعانامه‌يى نظرِ إعتباره آلوب جواب ويرمديگمڭ سببى، بزى برائت ايتديرن اوچ عادل محكمه‌نڭ حيثيتنى قيرمامق و إهانت ايتمه‌مك ايچوندر. چونكه او محكمه‌لر، شيمدى إدّعانامه‌ده‌كى أساسلرى تماميله اينجه‌دن اينجه‌يه تدقيقدن صوڭره بزه برائت ويرمشلر. اونلرڭ برائتنى هيچه صايمق، عدليه‌نڭ شرفنه ايليشمكدر