ايكنجى نقطه: مقامِ إدّعا جربزه‌سيله بيڭلر مسائل ايچنده، بر ايكى مسئله‌يه، خاطريمزه گلمه‌ين بعض معنالر ويره‌رك بزى إتهام ايدييور. حالبوكه او مسائللر نورڭ بيوك مجموعه‌لرنده وار. مصر جامع الأزهر علماسى و شامِ شريف بيوك عالملرى و مكّۀِ مكرّمه و مدينۀِ منوّره‌نڭ مدقّق خواجه‌لرى و حلب و سائره خصوصًا ديانت رياستنڭ محقّق عالملرى اونلرى گوروب كمالِ تقديرله تحسين و تصديق ايتدكلرى حالده، خواجه‌وارى و عالمانه بعض علمى إعتراضلرى بو إدّعانامه‌ده حيرتله و تعجّبله گوردم. هايدى بعض ياڭليشلرم بولونسه بيله، بيڭلر عالملرڭ گورمدكلرى ويا ايليشمدكلرى، إعتراضنامه‌ده‌كى او ياڭليشلر حقيقى اولسه ده بر صوچ اولاماز، يالڭز علمى بر خطا اولابيلير. هم اوچ محكمه بتون رسالۀِ نورى و بزلرى برائت ايتديردى. يالڭز أسكيشهر محكمه‌سى بر تستّرِ نسوان مسئله‌سنه دائر يگرمى دردنجى لمعه‌نڭ اون بش كلمه‌سنى سبب گوستروب بڭا و يوزده اون بش آرقداشمه خفيفجه بر جزا ويردى. سزه تقديم ايتديگم تتمّۀِ إعتراضمده اوچ يوز أللى بيڭ تفسيرڭ حكمنه إتّباع ايله او تفسيرم ايچون محكوميتمى، روىِ زمينده عدالت وارسه او حكمى قبول ايتمز دييه يازمشم. مقامِ إدّعا بيڭ دره‌دن صو گتيرر گبى، يگرمى سنه‌دن بَرى يازيلان كتاب و مكتوبلرڭ بعض جمله‌لرينى ذكاوتيله عليهمزه چويرمگه چاليشمش. حالبوكه بو نقطه‌ده بزى برائت ايتديرن اوچ دگل بلكه بش آلتى محكمه بو موهوم صوچده بزه شريك اولويورلر. بن او عادل محكمه‌لرڭ حيثيتنه ايليشمه‌مك لازم گلييور دييه مقامِ إدّعايه خاطرلاتييورم