هم سزه شكوا ايدييورم كه؛ قرق صحيفه‌لى و يوزر ياڭليشى بولونان و قلبلريمزى ياره‌لايان إدّعانامه‌يى تماميله بزه ايكى ساعت ديڭلتديرديگڭز حالده، عينِ حقيقت بر بچق صحيفه‌يى اوڭا قارشى (إصرارمله برابر) ايكى دقيقه اوقومغه مساعده ايتمديگڭز ايچون، اوڭا مقابل إعتراضنامه‌مى تماميله اوقومغه، عدالت نامنه سزدن ايسته‌يورم

ثالثًا: هر بر حكومتده مخالفلر وار. آسايشه ايليشمه‌مك شرطيله، قانونًا اونلره ايليشيلمز. بن و بنم گبى دنيادن كوسمش و يالڭز قبرينه چاليشانلر؛ ألبته بيڭ اوچ يوز أللى سنه‌ده، أجداديمزڭ مسلگنده و قرآنمزڭ دائرۀِ تربيه‌سنده و هر زمانده اوچ يوز أللى ميليون مؤمنلرڭ تقديس ايتديگى دستورلرينڭ مساعده ايتديگى طرزده حياتِ باقيه‌سنه چاليشمايى ترك ايدوب؛ گيزلى دشمنلريمزڭ إجباريله و دسيسه‌لريله فانى و قيصه‌جق حياتِ دنيويه‌سى ايچون، سفيهانه بر مدنيتڭ أخلاقسزجه‌سنه بلكه بر نوع بولشويزمده اولديغى گبى وحشيانه قانونلره، دستورلره طرفدار اولوب اونلرى مسلك قبول ايتمكلگمز هيچ ممكن ميدر؟ و دنياده هيچ بر قانون و ذرّه مقدار إنصافى بولونان هيچ بر إنسان بونلرى اونلره قبول ايتديرمگه جبر ايتمز. يالڭز او مخالفلره ديرز: بزه ايليشمه‌يڭز، بز ده ايليشمه‌مشز

ايشته بو حقيقته بناءًدر كه؛ آياصوفيايى پوتخانه و مشيختى قيزلرڭ ليسه‌سى ياپان بر قوماندانڭ كيفى قانون نامنده‌كى أمرلرينه فكرًا و علمًا طرفدار دگلز و شخصمز إعتباريله عمل ايتمييورز. و بو يگرمى سنه إشكنجه‌لى أسارتمده أشدِّ ظلم شخصمه ايديلديگى حالده سياسته قاريشمدق، إداره‌يه ايليشمه‌دك، آسايشى بوزمادق. يوز بيڭلر نور آرقداشم واركن، آسايشه طوقونه‌جق هيچ بر وقوعاتمز قيد ايديلمدى. بن شخصم إعتباريله هيچ حياتمده گورمه‌ديگم بو آخر عمرمده و غربتمده شدّتلى إهانتلر و طماريمه طوقونديره‌جق حقسز معامله‌لر سببيله، ياشامقدن اوصاندم. تحكّم آلتنده‌كى سربستيتدن دخى نفرت ايتدم. سزه بر إستدعا يازدم كه؛ هركسه مخالف اولارق بن برائتمى دگل، بلكه تجزيه‌مى طلب ايدييورم. و خفيف جزايى دگل، سزدن أڭ آغير جزايى ايسته‌يورم. چونكه بو أمثالسز، عجيب ظلمى معامله‌دن قورتولمق ايچون، يا قبره ويا حپسه گيرمكدن باشقه چاره‌م يوق. قبر ايسه، إنتحار جائز اولماديغندن و أجل گيزلى اولماسندن شيمديلك أليمه گچمه‌ديگندن، بش آلتى آى (حاشيه) تجريدِ مطلقده بولونديغم حپسه راضى اولدم. فقط، بو إستدعايى معصوم آرقداشلريمڭ خاطرلرى ايچون شيمديلك ويرمدم

-----------------------------------------------------------------------

(حاشيه : شيمدى اون يدى آى اولدى عين حال دوام ايدر