رسالۀِ نورڭ حقيقتى و شاكردلرينڭ شخصِ معنويسى، بو زمان و بو زمينده او شدّتلى إحتياجڭ يوزينى كندينه چويرمش. بنم شخصمى (خدمت إعتباريله بيڭدن بر حصّه‌سى آنجق بولونديغى حالده) او خارقه حقيقتڭ و او خالص مخلص شخصيتڭ بر ممثّلى ظن ايدوب او توجّهى گوسترييورلر. گرچه بو توجّه هم بڭا ضرر، هم آغير گلييور. هم ده حقّم اولماديغى حالده حقيقتِ نوريه‌نڭ و شخصيتِ معنويه‌سنڭ حسابنه سكوت ايدوب او معنوى ضررلره راضى اولويورم. حتّى إمامِ على (رض) و غوثِ أعظم (ق‌س) گبى بعض أوليانڭ إلهامِ إلٰهى ايله بو زمانمزده قرآنِ حكيمڭ معجزۀِ معنويه‌سنڭ بر آيينه‌سى اولان رسالۀِ نورڭ حقيقتنه و خالص طلبه‌لرينڭ شخصِ معنويسنه إشارتِ غيبيه ايله خبر ويردكلرى ايچنده بنم أهمّيتسز شخصمى او حقيقته خدمتم جهتيله نظره آلمشلر. بن خطا ايتمشم كه؛ اونلرڭ شخصمه عائد بر پارچه‌جق إلتفاتلرينى بعض يرده تأويل ايدوب رسالۀِ نوره چويرمه‌مشم. بو خطامڭ سببى ده، ضعفيتم و يارديمجيلريمى اوركوته‌جك أسبابڭ چوغالتيلمامسى و سوزلريمه إعتمادى قزانمق ايچون ظاهرًا شخصمه بر قسمنى قبول ايتمشدم. سزه إخطار ايدييورم: فانى و قبر قپوسنده‌كى چوروك شخصمى چوروتمگه إحتياج يوق و بو قدر أهمّيت ويرمگه ده لزوم يوق. فقط رسالۀِ نورله مبارزه ايده‌مزسڭز و ايتمه‌يڭز. اونى مغلوب ايده‌مزسڭز. مبارزه‌ده ملّت و وطنه بيوك ضرر ايدرسڭز. فقط شاكردلرينى طاغيدامازسڭز. چونكه حقيقتِ قرآنيه‌نڭ محافظه‌سى يولنده قرق أللى ميليون شهيد ويرن بو وطنده‌كى گچمش أجدادلريمزڭ أحفادلرينه بو زمانده حقيقتِ قرآنيه‌نڭ محافظه‌سى و عالمِ إسلامڭ نظرنده أسكيسى گبى ديندارانه قهرمانلقلرى ترك ايتديريلميه‌جك. ظاهرًا چكيلسه‌لر ده، او خالص شاكردلر روح و جانيله او حقيقته باغليدرلر. و او حقيقتڭ بر آيينه‌سى اولان رسالۀِ نورى ترك ايدوب، او ترك ايله وطن و ملّت و آسايشه ضرر ويرميه‌جكلردر. صوڭ سوزم: {فَاِنْ تَوَلَّوْا فَقُلْ حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ}