أهلِ وقوفڭ إنصافلى خواجه‌لرندن اوچ سؤالم وار

بريسى: بر آدم، ديگر بر آدمى صافى بر نيّتله اونى مدح ايتمكله مسئول اولور مى؟ خصوصًا او ايسته‌مديگى، ألندن گلديگى قدر او مدحلرى يا ردّ ويا باشقه‌سنه چويرديگى و او خالص دوستنى قاچيرمامق ايچون اونى تكدير ايتمه‌يوب، مدحنى يوز درجه حدّمدن فضله‌در دييه سكوت ايله مقابله ايتمه‌سى هيچ خودفروشلق صاييلير مى؟

ايكنجى سؤال: عجبا اورته‌لقده دين عليهنده بو دهشتلى هجوملر و طاغ گبى دينى مسئله‌لر ايچنده نور شاكردلرندن بر حقيقت عاشقى ضررسز و جزئى بر خطاءِ علمى و ياڭليش بر قناعتى جهتنده بويله تكدير و تزييفه مستحق اولور مى؟ سز گبى استادلردن (مدحيه يازان طلبه) شفقتله خطاسنى إخطار بكلركن بويله عدليه أليله طوقاتلامق جائز اولور مى؟

اوچنجى سؤال: بو يگرمى سنه‌در حدسز معارضلره قارشى صارصيلميان و يوز بيڭلر محتاجلرڭ ايمانلرينى قوّتلنديرن رسالۀِ نوره بر ايكى مسئله ايچون بو طرز تنقيديڭز ياقيشير مى؟

هم او مدقّق عالملره بونى خاطرلاتييورم كه؛ راپورلرنده، أحمد فيضى‌نڭ مدحيه‌سنڭ باشنده بر مكتوبمى گورمه‌لرندن، گويا او مدحلرى بن كنديمه ياپمشم گبى تنقيد ايدييورلر. حالبوكه او مكتوبم بنم شخصمڭ حقّنده‌كى مدحلرينى قبول ايتمه‌مك و قالديرمق ايچون ايدى كه، بر قسمنى قالديردم. بر قسمنى ده تعديل ايده‌جكدم. فقط عجله ايدوب تام ياپمه‌دن او مكتوبى بر قارداشمه گوندرمشدم. اونلر دخى او محرم مدحيه‌نڭ باشنه قويوب خصوصى بر ذاته گوندردكلرى زمان حكومتڭ ألنه گچمش. عجبا بويله خصوصى تقريض و صِرف علمى و بر قناعتِ وجدانيه و محرم آرقداشلرڭ مابيْننده و صوڭره تام تعديل ايتمك فكريله بر مشورت طرزنده گزمه‌سى، بو شدّتلى إعتراضه مستحق اولور مى؟ هم قيرمزى و سياه جلدلى ايكى مجموعه‌جق، آرقداشلره خصوصى و تبريك و تشويق و تلطيف ايچون يازيلمش بعض خصوصى مكتوبلردر. هر ناصلسه بر ايكى ذات مراق ايدوب ضايع اولماسين دييه بر دفتره طوپلامش. تحرّيده ضابطه ألنه گچمش. عجبا بويله مكتوبلردن أحكام چيقارمق و سؤال و جوابه مدار ايتمك و سياسته تماس ايتديرمگه چاليشمغه هيچ إحتياج وار مى؟ قرآنه هجوم ايدن دهشتلى أژدرهالرى گورمييور، باقمييور، سينكلرڭ ايصيرماسيله اوغراشييور گبى اولماز مى