٤٦، ٤٧. كندى كرامتنه او قدر اينانمشدر كه، إلٰهى و طبيعى اولان بر چوق حادثه‌لرى، كنديسنڭ و رسالۀِ نورڭ كرامتيدر دير

ج - بو خطاسنده بر قاچ وجهله ياڭليشى وار. إلٰهى و طبيعى اولارق ايكى قسمه آييرمق و طبيعته ده بر حصّۀِ ايجاد ويرمك، دينده بر ياڭليش اولديغى گبى؛ رسالۀِ نوره و شاكردلرينه گلن ظلمڭ عين زماننده زلزله گبى متعدّد حادثه‌لرڭ توافقلرى، رسالۀِ نورڭ مقبوليتنه و بر صدقۀِ مقبوله حكمنه گچديگنه بر إشارتِ غيبيه‌در ديمه‌سنى تفاخر ظن ايتمك، إفترا اولديغنى هركس بيلير

٤٨. رسالۀِ نورڭ طوقادى اولارق وصفلانديرمقده‌در

ج - بونى مدافعاتمده پك ظاهر بر خطا اولديغنى إثبات ايتديگمز گبى رسالۀِ نورڭ طوقاديدر دينيلمه‌مش، بلكه رسالۀِ نور صدقۀِ مقبوله گبى بلالرڭ دفعنه وسيله اولماسندن او گيزلنديگى و مصادره ايديلديگى زمانده بعض بلالر فرصت بولوب باشمزه گلير دينيلمش. بو ايسه، عدالتِ إلٰهيه‌نڭ بر طوقاديدر

٤٩. مختلف يرلرده اولان زلزله‌لر و سيلابلر، رسالۀِ نورڭ شدّتلى برر طوقادى اولارق وقوع بولمشدر

ج - جوابى مكرّر ويريلمش بر خطايى تكرار ايتمك، غرضكارانه بر ياڭليشدر