٥٠، ٥١. بو سيلاب و زلزله‌لردن رسالۀِ نورڭ و بِالنَّتيجه كنديسنڭ كرامتيله قورتولمشلردر. و معصوملر و چوجقلر او بلالردن ضرر گورمشلر. سعيد بونى ايضاح ايتمه‌مش و ايده‌مه‌مشدر

ج - رسالۀِ نورڭ مكرّر يرلرنده يازيلمش كه، ظالملره گلن مصيبتلرده معصوملرڭ تلف اولان ماللرى صدقه و وفات ايدنلر ده شهيد حكمنده اولديغنى بيان، بو ياڭليشنى و سطحيلگنى گوسترر

٥٢. خير و شرّڭ اللّٰهدن اولديغنى إنكار يولنه صاپمق گبى بر تضاده دوشمشدر

ج - رسالۀِ نوردن قدر رساله‌سى اولان يگرمى آلتنجى سوزڭ سرِّ قدرى أمثالسز بر صورتده بيانى و ايمانڭ أركانلرينى رسالۀِ نورڭ خارقه بر طرزده إثباتى ميدانده ايكن بويله بر إفترا، غرضكارلقدن باشقه بر شى دگلدر

٥٣. نور شاكردلرينڭ بعضلرى اوڭا بر مهديلك ده توجيه ايتمشلردر

ج - إعتراضنامه‌مده قطعى حجّتلرله اونڭ بو خطاسى ردّ ايديلمش. هم هيچ بر وقت، دگل بويله بيوك مقاملرى بلكه كوچك مدح و حسنِ ظن ايله نفسِ أمّاره‌سنه بر بنلك ويرمه‌مك ايچون ردّ ايتديگى محكمه‌لرده ده گورولمشدر

٥٤. مجدّدلك و بيوك مقاملر ويرن شاكردلرينڭ خطابه‌لرينه، أنانيت و تفاخره اولان مَيلى ايجابى إعتراض ايتميه‌رك، بو توجّهلرى قبول ايتديگى گوز اوڭنده‌در.

ج - بو خطاسنده قاچ وجهله إفترا وار اولديغى إعتراضنامه‌مده و بو جدولده قاچ يرده إثبات ايديلمشدر