عزيز، صدّيق، صارصيلماز، صيقنتيدن اوصانوب بزلردن چكيلمز قارداشلرم!

شيمدى مادّى، معنوى بر صيقنتيدن نفسم سزڭ حسابڭزه بنى محزون أيلركن، بردن قلبه گلدى كه؛ هم سنڭ، هم بوراده‌كى قارداشلرڭ تك بريسيله ياقينده گوروشمك ايچون بو زحمت و مشقّتڭ باشقه صورتده اون مِثلنى چكسيديڭز ينه اوجوز اولوردى. هم نورڭ تقوادارانه و رياضتكارانه مشربى، هم عمومه و أڭ محتاجلره حتّى معارضلره درس ويرمك مسلگى، هم دائره‌سنده‌كى شخصِ معنوى‌يى قونوشديرمق ايچون أسكى زمانده أهلِ حقيقتڭ سنه‌ده هيچ اولمازسه بر ايكى دفعه إجتماعلرى و صحبتلرى گبى؛ نور شاكردلرينڭ ده، بر قاچ سنه‌ده أڭ مساعد اولان مدرسۀِ يوسفيه‌ده بر دفعه طوپلانمالرينڭ لزومى جهتنده بيڭ صيقنتى و مشقّت دخى اولسه أهمّيتى يوقدر. أسكى حپسلريمزده بر قاچ ضعيف قارداشلريمزڭ اوصانوب دائرۀِ نوريه‌دن چكينمه‌لرى اونلره پك بيوك بر خسارت اولدى و نورلره هيچ ضرر گلمدى. اونلرڭ يرينه داها متين، داها مخلص شاكردلر ميدانه چيقديلر. مادام دنيانڭ بو إمتحانلرى گچيجيدر، چابوق گيدرلر. ثوابلرينى، ميوه‌لرينى بزلره ويررلر. بز ده عنايتِ إلٰهيه‌يه إعتماد ايدوب صبر ايچنده شكر ايتملى‌يز.