عزيز، صدّيق قارداشلرم

أوّلا: {اَلْخَيْرُ فِىمَا اخْتَارَهُ اﷲُ} سرّيله، إن شاء اﷲ محكمه‌مزڭ تأخيرنده و تخليه اولان قارداشلريمزڭ ينه محكمه گوننده بوراده بولونمالرنده بيوك خيرلر وار.

أوت رسالۀِ نورڭ مسئله‌سى؛ عالمِ إسلامده، خصوصًا بو مملكتده كلّى بر أهمّيتى بولونديغندن بويله هيجانلى طوپلامالر ايله عمومڭ نظرِ دقّتنى نور حقيقتلرينه جلب ايتمك لازمدر كه، اميديمزڭ و إحتياطمزڭ و گيزله‌مه‌مزڭ و معارضلرڭ كوچولتمه‌لرينڭ فوقنده و إختياريمزڭ خارجنده بويله شعشعه ايله رسالۀِ نور كندى درسلرينى دوست و دشمنه آشكارًا ويرييور. أڭ محرم سرلرينى أڭ نامحرملره چكينميه‌رك گوسترييور. مادام حقيقت بودر، بز كوچوجك صيقنتيلريمزى كينين گبى بر آجى علاج بيلوب صبر و شكر ايتملى‌يز، ”ياهو بو ده گچر“ ديمه‌لى‌يز

ثانيًا: بو مدرسۀِ يوسفيه‌نڭ ناظرينه يازدم: بن روسيه‌ده أسير ايكن، أڭ أوّل بولشويزمڭ فورطنه‌سى حپسخانه‌لردن باشلاديغى گبى، فرانسز إختلالِ كبيرى دخى أڭ أوّل حپسخانه‌لردن و تاريخلرده سرسرى ناميله ياد ايديلن محبوسلردن چيقماسنه بناءً؛ بز نور شاكردلرى، هم أسكيشهر، هم دڭزلى، هم بوراده ممكن اولدقجه محبوسلرڭ إصلاحنه چاليشدق. أسكيشهر و دڭزليده تام فائده‌سى گورولدى. بوراده داها زياده فائده اولاجق كه، بو نازك زمان و زمينده نورڭ درسلريله گچن فورطنه‌جق (حاشيه) يوزدن بره ايندى. يوقسه إختلافدن و بويله حادثه‌لردن إستفاده ايدن و فرصت بكله‌ين خارجى مضر جريانلر، او باروته آتش آتوب بر يانغين چيقه‌جقدى