عزيز، صدّيق قارداشلرم

ليلۀِ معراج، ايكنجى بر ليلۀِ قدر حكمنده‌در. بو گيجه ممكن اولدقجه چاليشمقله قزانج بردن بيڭه چيقار. شركتِ معنويه سرّيله، إن شاء اﷲ هر بريڭز قرق بيڭ ديل ايله تسبيح ايدن بعض مَلكلر گبى، قرق بيڭ لسان ايله بو قيمتدار گيجه‌ده و ثوابى چوق بو چلّه‌خانه‌ده عبادت و دعالر ايده‌جكسڭز و حقّمزده گلن فورطنه‌ده بيڭدن بر ضرر اولمامسنه مقابل، بو گيجه‌ده‌كى عبادت ايله شكر ايدرسڭز. هم سزڭ تام إحتياطڭزى تبريك ايله برابر، حقّمزده عنايتِ ربّانيه پك ظاهر بر صورتده تجلّى ايتديگنى تبشير ايدرز

عزيز، صدّيق قارداشلرم

أوّلا: سزڭ ليلۀِ معراجڭزى بتون روح و جانمله تبريك ايدرم

ثانيًا: يگرمى سنه‌دن بَرى بر دعوامز كه، آسايشه ممكن اولديغى قدر نور شاكردلرى طوقونمييورلر. و بزه هجوم ايدنلره، أڭ باشده أمنيتى و آسايشى بوزمق دعوالرينه بر أماره و دعوامزى جرح ايتمگه بهانه اولماسى قوّتله محتمل بولونان بو حپس حادثه‌سى، عنايتِ إلٰهيه ايله خارقه بر طرزده، سزڭ صداقت و إخلاصڭزڭ بر كرامتى اولارق يوزده بره ايندى. قبّه حبّه ايديلدى. يوقسه حقّمزده حبّه‌يى قبّه ياپانلر بوندن إستفاده ايدوب، عليهمزده‌كى إفترالرينى چوقلره اينانديره‌جقلردى

ثالثًا: بنى مراق ايتمه‌يڭز. سزڭله بر بناده بولونمام، هر زحمتمى و صيقنتيمى هيچه اينديرر. ذاتًا بوراده طوپلانمامزڭ چوق جهتلرله أهمّيتى وار. و خدمتِ ايمانيه‌يه فائده‌لرى چوقدر. حتّى بو دفعه، تتمّۀِ إعتراضده‌كى أهمّيتلى بعض حقيقتلر او آلتى مقاماته گيدوب، تام دقّتلرينى جلب ايدوب حكمنى بر درجه اونلرده إجرا ايتمه‌سى، بتون صيقنتيلريمزى هيچه اينديردى