رابعًا: ممكن اولديغى قدر نورلرله مشغوليت هم صيقنتيلرى إزاله ايدر، هم بش نوع عبادت صاييلابيلير

خامسًا: نورڭ درسلرى واسطه‌سيله، گچن مصيبت يوزدن بره ايندى. يوقسه زمين و زمانڭ نزاكتى جهتيله، باروته آتش آتمق حكمنده او تك حبّه قبّه‌لر اولاجقدى. حتّى رسمى بر قسم مأمورلر ديمشلر كه: ”نور درسنى ديڭله‌ينلر قاريشمديلر.“ أگر عموم درسنى ديڭله‌سيدى، هيچ بر شى اولمازدى. سز ممكن اولديغى قدر ايكيلگه ميدان ويرمه‌يڭز. حپس صيقنتيسنه باشقه‌سى علاوه اولماسين. محبوسلر دخى نورجيلر گبى قارداش اولسونلر، بربرندن كوسمه‌سينلر.

عزيز، صدّيق، مخلص قارداشلرم

بزلر إمكان دائره‌سنده بتون قوّتمزله لمعۀِ إخلاصڭ دستورلرينى و حقيقى إخلاصڭ سرّينى مابيْنمزده و بربريمزه قارشى إستعمال ايتمك، وجوب درجه‌سنه گلمش. قطعى خبر آلدم كه، اوچ آيدن بَرى بوراده‌كى خاص قارداشلرى بربرينه قارشى مشرب ويا فكر إختلافيله بر صوغوقلق ويرمك ايچون اوچ آدم تعيين ايديلمش. هم متين نورجيلرى اوصانديرمقله صارصمق و نازك و تحمّلسزلرى أوهاملانديرمق و خدمتِ نوريه‌دن واز گچيرمك ايچون سببسز محكمه‌مزى اوزاتييورلر. صاقين صاقين!. شيمدى‌يه قدر مابيْنڭزده‌كى فداكارانه اخوّت و صميمانه محبّت صارصيلماسين. بر ذرّه قدر اولسه بيله، بزه بيوك ضرر اولور. چونكه پك آز بر صارصينتى، دڭزليده (........) گبى خواجه‌لرى يبانيلشديردى. بزلر بربريمزه (لزوم اولسه) روحمزى فدا ايتمگه، خدمتِ قرآنيه و ايمانيه‌مز إقتضا ايتديگى حالده، صيقنتيدن ويا باشقه شيلردن گلن تيتيزلكله حقيقى فداكارلر بربرينه قارشى كوسمگه دگل، بلكه كمالِ محويت و تواضع و تسليميتله قصورى كندينه آلير؛ محبّتنى، صميميتنى زياده‌لشديرمگه چاليشير. يوقسه حبّه قبّه اولوب تعمير ايديلميه‌جك بر ضرر ويره‌بيلير. سزڭ فراستڭزه حواله ايدوب قيصه كسييورم