عزيز و محترم استادم! بو دنيا مؤمنه زنداندر ديرلر. ايشته نشرينه، إظهارينه، بياننه واسطه اولديغڭز نورلر، بزه بو قراڭلق دنيامزى آيدينلاتدى. خلقتده‌كى حقيقتى تعليم ايتدى. باقى، دائمى و سرمدى، سعادتلى حياتى تدريس ايتدى. شخصًا بو نورلر اولماسه ايدى، حالم نه اولاجقدى؟ يا نورلره ايريشمسه ايدم، نه ياپاجقدم؟ يا بو نورلرڭ نشرينه {عَلٰى قَدْرِ الطَّاقَةِ وَاْلاِمْكَانِ} لطفِ إلٰهى ايله چاليشديريلماسه ايدم، بتون قزانجم معصيت و قره يوزله، پريشان حال ايله، ناصل درگاهِ إلٰهيه‌يه چيقه‌جقدم؟ الحمد ِﷲ ثمّ و ثمّ الحمد ِﷲ، نيّتِ خالصه و جزءِ لايتجزّا قبيلندن اولان قرآنى خدمت سببيله، بو عبدِ پرتقصير ده إن شاء اﷲ دعاڭزله رحمتِ إلٰهيه‌يه نائل اولور اميدنده‌يم.

أفنديم، هيچ شكّ و شبهه‌م قالمادى كه؛ نور نوردن سچيله‌مديگى گبى، نور درياسنڭ نورانى طلبه‌لرى ده، نره‌ده اولورسه اولسون هپسى بر غايه‌ده، عمومى بر ذهنيتده، يكديگرلرينه رقابتلرى يوق، دائما بربرينڭ أوصافِ ممتازه‌سيله مفتخر و مباهى، صميميت و وفا خصوصنده، رفقاسنى شخصنه ترجيح ايدر، بر أملده بولونمالرى يگانه أمل و غايه‌لرى اولان توحيدڭ بر علامتِ ممتازه و فارقه‌سى اولان إتّحاد و تساندِ حقيقيه و مشروعه‌يى قالاً و فعلاً و حالاً گوسترملريله ثابتدر كه، بو حال بر علامتِ موفّقيتدر.