أوت ناصل سوزلرم حقسز اولسون كه، أڭ تهلكه‌لى آنلرده بيله حقّى سويله‌مكده صوصميان و پك عالى روحى طاشييان و طلبه‌لرينه هر آن تسلّى نورلرينى طاغيدان، قرآنِ كريمڭ بوگونكى دلاّلِ محترمى اولان استادم! سزڭ دينِ مبينِ إسلامه اولان مربوطيتڭزه و او بيوك محبّتڭزه و او يوكسك سعيڭزه مكافات اولارق دفترِ حسناتڭزه جنابِ واجب الوجود حضرتلرى لاَ يُعَدّ وَ لاَ يُحْصٰى أجرلرى يازماسنى رحمتِ إلٰهيه‌دن نياز ايدرم.

ناصل بوگونكى بشريت سزه و رسالة النوره مديون اولماسين كه؛ سمامزده طولاشان گونشڭ صاچديغى و هر آن اُفوليله بر باشقه عالمى گوسترن نورلرى گبى دگل، قرآنڭ عرشِ أعظمندن گلن نورلرله ئولمز، توكنمز، سرمدى بر نورى، رساله‌لريڭزده گوسترييورسڭز.

ايشته او رساله‌لر كه، هر برى باشلى باشنه منبعلرى و مجرالرى آيرى فقط بر بحرِ محيطِ عمّانه دوكولن نهرلر گبيدر. صوڭسز اولان بو نهرلرڭ، هانگيسنه وارسه ناصل طويونجيه قدر صو ايچمز؟ أل و يوزلرينى تميزله‌مك ايسته‌ينلر، ناصل اولويور ده بو أنهاردن إستفاده ايتمز؟ وياخود أراضيلرينى إسقا ايچون جدوللر ياپارق هانگى طرفه گوتورولسه، عظيم جماعتلر ناصل تفيّض ايتمز؟

بو أنهارده اويله عظيم شفالر وار كه، خسته‌لر ايچسه، هر درلو دوايى ايچنده بولورلر. ياره‌ليلر ايچسه، بيڭ درلو ياره‌لرينه مرهم بولورلر. إختيارلر ايچسه، حياتِ أبديه‌نڭ جوانمرد گنجلرندن اولورلر. تازه‌لر ايچسه، سعادتِ داريْنى بر آنده ألده ايدرلر.

رساله‌لرى اوقويانلر، سَوْگيلى استادم سزڭ نه بيوك و عالى بر قلبه مالك بولونديغڭزى تسليم ايچون، بيلمم تفكّره إحتياج وار مى؟

بونجه زماندن بَرى ”قرآنِ عظيم الشانڭ دلاّلى‌يم و بو قدسى وظيفه‌مى هيچ بر شيئه دگشمه‌م“ دييه واقع اولان إعلاناتڭزه، بر قات داها قوّت ويرن، بو كرّه‌كى نشر بيورديغڭز يگرمى طوقوزنجى مكتوبڭ سكزنجى قسمنڭ سكز صحيفه‌لك اولان سكزنجى رمزى نه گوزل گوسترييور و بو گوستريلن حقيقتلره مفتون اولمامق ممكن مى؟