بيڭ اوچ يوز سنه‌دن بَرى، صاحبِ إنصافى حيرتده بيراقان و دنيانڭ هر كوشه‌سنده و بشرڭ هر طبقه‌سنده، جنّ و بشر لساننده، سماواتده مَلك و روحانيلر لساننده، أڭ يوكسك مقامِ ممتازى إشغال ايدن، او فرقانِ إلٰهينڭ أسرارِ مهمّه‌سندن و إعجازِ عظيمه‌سندن بر پارچه‌سى داها، صوصمق بيلمه‌ين معجزنما بر صدا و لطيف بر آواز و توكنمز بر فيضله قارشيمزه چيقييور.

او قيمتدار قرآنڭ بوگون مكوّناتى يدِ قدرتنده طوتان و عظمتِ كبرياسيله إداره ايدن و عظمتِ جلالى قارشيسنده هر شيئى كندينه سجده ايتديرن بر ذاتِ واجب الوجودڭ كلامى اولديغنى، اوزرنده‌كى حدسز طامغه‌لريله گوسترن رساله‌لريڭزڭ قيمتى نه بيوكدر. او رساله‌لره ناصل قيمت ويريلير، ناصل باشقه‌سيله موازنه ايديلير، ناصل بر باشقه‌سنڭ تفوّقى تخطّر ايديلير؟

بشرڭ ظلمتلى سيماسنه نورلر صاچان و توحيد خارجنده‌كى هر درلو عقيده‌لرى زير و زبر ايدن و شاكردلرينه گولومسه‌يه‌رك طاتلى بر يوزله باقان و خوش و پك شيرين بر لسان ايله سويله‌ين او رساله‌لر و او رساله‌لرڭ صاحبى و ناشرى اولان سَوْگيلى استادم، سز طلبه‌لريڭزڭ قلبلرنده رساله‌لريڭزله ياشييورسڭز. هم اويله بر صورتده ياشييورسڭز كه، كوچك بر إشارتڭزه مهيّا طلبه‌لريڭزڭ روحلرنده ايرماقلرڭ چاغلادقلرى گبى توالى ايدن و توكنمك بيلمه‌ين إلٰهى بر محبّتله ياشييورسڭز. حياتِ فانيه‌يه وداع ايتسه‌ڭز بيله، بيوك بيوك جماعتلرڭ آراسنده حرمتله ياد ايديله‌جگڭزه (حاشيه) و نامڭزڭ دنيا و عقباده إحترامله طاشنه‌جغنه و رساله‌لريڭزڭ پك بيوك خوٰاهشله رواجده اولاجغنه قويًا اميدوارم