بن ايسته‌يورم كه؛ بر آن أوّل بر يره چكيله‌يم ده، مساعيدن خارج زمانلريمى، او علوى و مقدّس خزينۀِ حقيقت و آثارِ گران‌بها خدمتنده دوامه باشلايه‌يم. فقط بوگونلك بو يوجه أملمڭ حصولندن، بِالضروره و بِالمجبوريه محروم قالييورم. هيچ اولمازسه شو گونلرده أليمده، او مطالعه‌سى گوڭللره و قلبلره بر صفاىِ سرمدى و جاودانى بخش ايدن كتابِ كائناتڭ برر لمعه‌سى و برر نورِ تمثالى اولان أثرلريڭزدن بر ايكى دانه‌سى أليمده بولونسه ايدى، بنم ايچون ناقابلِ تعريف بر سُرور و سعادت منبعى اولاجقدى و نه بولونماز بر نعمت، نه أله گچمز بر دفينه اولاجقدى.

چوق زمان أوّل صبرى أفندى آغابگم، يڭى چيقان قدسى و أسرارلى نورلردن، بر جزئى بارى اولسون گوندرمك فكرنده اولدقلرينى بيلديرييورلردى. غالبا مساعد وقت بولامدقلرندن، يازوب گوندره‌مديلر. هم بعض أثرلرى برابرمده گتيرمديگمدن چوق پشيمان اولويورم؛ اونلردن باشقه‌لرينى إستفاده ايتديرمك فرصتنى بولامازسه‌م ده، مطالعه ايدر، معنًا مجادله‌يه بر مدارِ قوّت اولوردى

نتيجه إعتباريله مادام كه شيمديلك او خزينه‌لردن إستفاده ايده‌مييورم؛ او حالده، كنديمى ضررلى گورمكده حقلى‌يم. إن شاء اﷲ دعاڭز همّتيله، ياقين بر زمان ظرفنده، او ضررلرى تلافى‌يه كافى بر زمان و بر فرصت أله گچر

بر عمرِ مقدّردن معدود اولان شو گونلرم، شكر و حمد ايله گچمكده‌در. بڭا اويله بر قناعت گلدى كه، قلبمى يوقلادقجه، قلبم بو قناعتى تقويه ايدييور.. نفسمله مجادله‌ده مظفّر اولاجغمى اُميد ايدييورم

عزيز استادم! شو هجرانه و فراقه، موقّت اولديغى ايچون تحمّل ايدييورم. آيريلغمز هر نه قدر موقّت اولسه، ينه بنى متأثّر ايدييور. بِالضروره مالايعنى شيلره معروض قالدقجه، آه دييورم، استاديمڭ ياننده اولسه ايدم و كندى كنديمه، داها طوغريسى قلبمه اُميد و جسارت توصيه ايدييورم. ردّ ايديلن بر آرزو ناصل كسبِ شدّت ايدرسه، أمللريمڭ شيمديلك حصوله گلمه‌مسيله، ايمان و أمللرم ده عين نسبتده كسبِ قوّت ايدييور، روحم يوكسه‌لييور؛ قلبمده آچيلان پنجره‌دن، معنًا داها سرين و داها گنيش نَفَس آلييورم