عزيز استادم! اوتوز برنجى مكتوبڭ اون اوچنجى لمعه‌سى، ”حكمت الإستعاذه“ نامِ عالى‌يى طاشييان بر پارچۀِ نورى آلدم. الحمد ِﷲ إستنساخه موفّق اولدم. جنابِ حق خزينۀِ بى‌نهايه‌سندن أمثالِ سائره‌سنى إحسان بيورسون. آمين بِحُرْمَةِ سيّد المرسلين

استادم أفنديم! بو عظيم حقيقتى طاشييان رساله، فقير طلبه‌ڭزده پك عظيم تأثيرات ياپارق، دماغم و بتون طويغو و حاسّه‌لرم، او عظيم حقائق اوزرينه سرپيله‌رك، طوپلانماز بر حاله گلديلر. گوندوزده گونشڭ ضياسى قارشيسنده قالان ييلديز بوجگى گبى، گرك گونشڭ تعريفنى و گركسه كندى شوقيله دائرۀِ محيطنده بولونانلرى تعريف ايده‌مديگى گبى؛ فقير، عين حال كسب ايتدم

أوّلا: بو رساله، ديگر توحيده دائر بيوك رساله‌لرڭ بر بيوك قارداشى اولابيلير. زيرا ناصل كه اوبر كتلۀِ نور، جنابِ حقّڭ عالمِ كبيرده جلوۀِ جمال و كمال و أسماءِ حسنى‌سنى پك ظاهر بر طرزده أعمٰى اولانلره ده گوسترديلر. عينًا بو پارچۀِ نور، عالمِ أصغر اولان و أسماءِ حسنى‌يه آيينه اولان و خلقتِ دنيانڭ روحى مثابه‌سنده‌كى بشرڭ، كمال و سقوطنه، أبديت و عدمنه سبب اولان أڭ بيوك وسيله و دسيسه‌لرى، پك يقينًا كشف ايدوب گوسترييورلر