أقطابِ خمسۀِ عظيمه‌نڭ برنجيسى و غوثِ أعظم ناميله مشتهر شيخ گيلانى حضرتلرينڭ، شيمديكى قرآنڭ خادملرينه باقان قصيده‌سنده‌كى إخباراتِ غيبيۀِ مهمّه‌يى حاوى، قيمتدار رساله‌يى قارداشلريمه و دوستلريمه اوقودم. و إن شاء اﷲ فرصت بولدقجه ينه اوقويه‌جغم. راحتسزلغم، بر صورتنڭ تقديمنه فرصت بخش ايتمه‌ديگى گبى، اوتوز ايكنجى سوزڭ برنجى و ايكنجى موقفلرندن ده اوچ درت صحيفه‌دن داها فضله يازمقلغمه مانع اولدى.

سَوْگيلى استادم! او بيوك شيخڭ مظهر اولديغى او بيوك تجلّى و نائل اولديغى او بيوك ألطافِ سبحانيه ايله سكز يوز سنه‌لك مسافه‌يى گورن و بو مدّت آراسنده گلوب گچنلره و بوگونڭ دهشتنى أهلِ ذوق و كشفه گوسترن يازيلرنده‌كى او درين و پك اينجه معنالر، إدراك ايده‌بيلديگم قدرينى دوشونوركن، أهلِ غفلتڭ نظرندن صاقلانمش اولان و فقط أهلِ حقيقتڭ گورمسنه مانع اولميان ماضى‌يى خاطرلادم. و بو رساله‌نڭ فيضيله مجاهدۀِ معنويه‌ڭزدن و أطرافڭزده طوپلانمش اولان فداكار، مجاهد طلبه‌لريڭزدن و معروض قالديغڭز مُهْلِكْ فلاكتلردن و نائل اولديغڭز، بو قدر عظيم ألطافِ إلٰهيه‌دن باشلايه‌رق، شاهِ گيلانى‌يه قدر و اوندن عصرِ سعادته قدر اوزانان، او اوزون زمانى خيالاً گزدم. او بيوك غوثڭ سكز يوز سنه أوّل إعلان ايتديگى بو حقيقتڭ قارشيسنده حيران اولدم. او بيوك شيخ أسكى سعيد گبى بر مريديله، يڭى سعيد گبى بر درس آرقداشيله قونوشويور. و قونوشمغه ده زمان و مكان مانع اولامييور. ايستر أرضڭ اوبر طرفنده اولسون، ايستر سماواتڭ أڭ اوزاق كوشه‌لرنده اولسون، ايستر حضرتِ آدم صفى اﷲ زماننده دنيايه وداع ايتمش اولسون.

ايشته بو محاوره نتيجه‌سنده بو إخباراتِ غيبيه‌يى و عجيبه‌يى سكز اون سنه أوّل اوگرنمش و شيمدى ده طلبه‌لريڭزه درس ويرييورسڭز. بو خدمتده تمايز ايدن آرقداشلريڭزه إرائه ايده‌رك، هر خصوصده ستايشه لايق خلوصى‌يى و اوڭا رفيق اولاجق بر قابليتده بولونان متواضع صبرى‌يى و خدمت و غيرتلريله صادقانه چاليشان سليمان و بكر آغا گبى طلبه‌لريڭزه إشارت أيله‌يورسڭز. و بو كوچك جماعتڭ إستنادگاهى اولان، عظيم جماعتلرڭ همّتلرينى و بو جماعتلرڭ ايچنده‌كى نورانى سيمالرى طانيتديرديغڭز گبى، شاهِ گيلانى زماننده‌كى هلاگو وقعه‌سيله ده زمانمزڭ رياكار منافقلرينه و بو منافقلرڭ رأسكارلرينه خطاب ايده‌رك ”ياقين بر إستقبالده قهّار بر أل سزه جزاڭزى تمامًا ويرمكله، معصوملرڭ إنتقامنى آلاجقدر.“ دييورسڭز. بو حقيقتلر گوستريلن طوقوز اون دليل ايله إثبات ايديلدكدن صوڭره، بو رسالۀِ شريفه ايله إعلان ايديلييوردى.