صوڭ گوندرديگڭز منهاج السنّة گبى لمعه‌لر حقّنده نه سويله‌سه‌م إفادۀِ مرام ايتمش اولامام. زيرا أثرلر بربرينى تعقيبًا نشر اولوندقجه، قيمتلرى ده مبسوطًا تزايد ايتمكده‌در. بزلره جنّت حياتى ياشاتمقده‌در. أثرلر حقّنده فقيرڭ مطالعه يوروتمسى كستاخلق اولور. چونكه شيخِ گيلانى‌نڭ مدح بيورديغى ذاتِ مباركڭ يازمش اولديغى أثرى تنقيد دگل، كمالِ حرمتله تصويب و تحسين و تقدير و بيوك بر ذوقِ روحانى ايله اوقومقدن باشقه نه ياپابيليرز؟ يالڭز شو قدر دييه‌بيليرم كه: بو ضلالت دورنده بزلره ذاتِ عاليلرى گبى يوكسك بر استادى لطف بيوران و شيمدى‌يه قدر أمثالنه تصادف اولونميان مكمَّل و مكمِّل أثرلر اوقوتوب أذواقِ نامتناهيه ايچنده ياشاتان خالقِ ذو الجلاله نهايتسز شكرلر ايتمكله، ايفاءِ وظيفۀِ عبوديت ايده‌بيليرسه‌ك بختيارز.

حضرتِ شيخِ گيلانى قُدِّسَ سرُّهُ العالى‌نڭ كرامتِ عجيبۀِ غيبيه‌سنى آلدم. حيرتمدن دوشونمگه باشلادم. آرادن چوق گچمه‌دن خدمت ايتديگم نور ألكتريق فابريقه‌سندن بر دوگمه چوريلدى. بر موملق بر ضيا گلدى. بر شيلر گورمگه باشلادم. عينيله يازييورم. قصور و نقصان، بيچاره علينڭدر

أوت استادم، ناصلكه فخرِ عالم (صلّى اﷲ عليه و سلّم) حضرتلرى شجرۀِ كائناتڭ حياتدار چكردگى، أنبيا و مرسلين او شجرۀِ مباركڭ داللرى اولوب، دالڭ إبتداسندن منتهاسنه قدر قطعى بر علاقه ايله دائمى بربرلرينى گوتورويورلر. بو سرّ ايچون حضرتِ آدم صفى اﷲ قوقلاديغى و حسّ ايتديگى نورِ محمّد عليه الصلاة والسلام حقّنده ديمش: ”يا ربّ، بنم آلنمده بر چيغيرتى وار، نه‌در؟“ جنابِ كبريا حضرتلرى بيورمش: ”نورِ محمّد عليه الصلاة والسلامڭ تسبيحيدر.“ عينًا كتبِ سابقه‌ده ده وسيلۀِ دنيا اولان شاهِ لَوْلاَكى أوصافيله، أصحابيله خبر ويرمه‌لرى گوسترييور كه؛ علومِ أوّلين و آخرينى جامع بر كتاب ايله بعث اولونه‌جق، كائناتڭ روحى حكمنده و بتون كائناتڭ گوزللكلرى كندى فطرتنده تجمّع ايدوب، تكمّلله طلوعى، فجردن صوڭره شمسڭ طلوعى گبى بكله‌نييوردى