أمرلريڭزه إمتثالاً، اُخروى قارداشمز خسرو بك طرفندن إرسال بويوريلان شايانِ حيرت و جاىِ دقّت، ”مهمّ بر إخبارِ غيبى“ إسمنى طاشييان چوق قيمتلى، معنالى، روحلى، سرورلى، تأثيرلى، لذّتلى، حكمتلى، نورلى أمريڭزى بو هفته آلديغمدن طولايى، جنابِ حق و فيّاضِ مطلق حضرتلرينه حمد و شكرلر و مشفق استاديمه يوزيمڭ قره‌سنه، قلبمڭ ياره‌سنه باقميه‌رق، درگاهِ إلٰهيه‌يه قپانوب دعالر أيلرم. و دفعاتله، {اَللّٰهُمَّ حَصِّلْ مُرَادَنَا وَ مَقْصُودَ اُسْتَاذِنَا سَعِيدِ النُّورْسِى بِحُرْمَةِ حَبِيبِكَ مُحَمَّدٍ النَّبِىِّ اْلاُمِّىِّ صَلَّى اﷲُ عَلَيْهِ وَ عَلٰى اٰلِهِ وَ صَحْبِهِ وَ سَلِّمْ اٰمِينَ} ديدم.

غوثِ أعظم شاهِ گيلانى (قُدِّسَ سِرُّهُ الْعَالِى) حضرتلرينڭ أثرلرنده‌كى غيبى و معنوى إخبار، بو بيچاره‌يى اويله بر حاله گتيردى كه، تعريفدن عاجزم. روحانيتلرنده‌كى جلالت و عظمت قارشيسنده آووج ايچنده صيقيلان بر طوپ خمور نه حاله گيررسه، بو بيچاره ده، اويله اولدم. بر شى دوشونه‌مز، سرسم، عادتا ميّتِ متحرّك بر حاله گلدم. گونلردن بَرى ذهنم و بتون حواسّم، همان تمامًا بو خارقه أثرله مشغول. بو حالتده ايكن، إستعداديمڭ فوقنده شويله بر قاچ بيت قلبمه و قلممه گلدى. قاعده‌سنه اويغون اولارق دوزلته‌مه‌دم. مشفق استاديمڭ عفولرينه إستنادًا يازييورم. تصحيحى، استاديمه و حبل اللّٰهه ياپيشان قارداشلريمه بيراقييورم.