اويله ده، اون دردنجى عصرڭ خادمِ قرآنى ده طوقوز ياشندن آلتمش (سكسان آلتى) ياشنه قدر بِلا إستثنا طوغريدن طوغرى‌يه قرآن نامنه خدمت و حركتى و زمانڭ پادشاهندن أڭ جاناوار رئيسلرينه باش أگمه‌ديگى، حتّى ترقّياتِ فنّيه و ذهنيه‌ده برنجيلگى إحراز ايدن آوروپا دولتلرينى إسكات ايدن، زمزمۀِ قرآنيه‌نڭ شفاخانه‌سندن نبعان ايده‌رك، اونلرڭ سملرينه قارشى ترياقلرى شيشه دگل، ماءِ جارى نهرلرله إعلاىِ كلمة اﷲ ايدن و اونلرڭ قلعه‌لرينى زير و زبر ايدن، أمثالى گورولمه‌مش اون دردنجى عصره مخصوص أنوارِ قرآنيه‌دن رسالۀِ نور ايله، جهانڭ جهاتِ ستّه‌سنى و سمانڭ يوزينى آيدينلاتان و ياره‌لى اولوب ئولمه‌ين أهلِ ايمانڭ ياره‌لرينى تداوى و سكسان ياشنده إختيارلرينى شابِّ أمرد و گنجلرينى معصوم بر حاله حضرتِ أيّوبوارى حيات بخشنه وسيله اولان خادمِ قرآنينڭ و نور رساله‌لرينى، دگل حضرتِ شيخ (ق‌س) آلتنجى عصردن اون دردنجى عصرده گورمسى، كتبِ سابقه‌ده رمزًا و حضرتِ قرآنده صراحةً گوسترمه‌لرى، او كتابِ مباركڭ شأنندندر، دييه‌بيله‌جگم. إن شاء اﷲ وظيفه‌نڭ مقبوليتنه إشارتدر كه، وظيفه‌نڭ أهمّيتنه بناءً جنابِ حق اونى چوق زمان أوّل گوستره‌رك، مبعوثِ عالم گزيدۀِ بنى آدم أفنديمزدن، خلفاءِ راشديندن (رضى اﷲ عنهم)، أقطابِ أوليادن اويله بر معنوى قوّت تراكم ايتمش اولويور كه؛ دگل بو زمانڭ كور و صاغيرلرى، دنيانڭ أڭ آزغين فرعون و نمرودلرى ده اولسه ينه قورقه‌جقلرى و آغز آچاميه‌جقلرى بديهيدر. ديلرم جنابِ حقدن أنوارِ قرآنيه‌نڭ {لاَ اِلٰهَ اِلاَّ اﷲُ مُحَمَّدٌ رَسُولُ اﷲِ} بايراغى آلتنده طوپلانان أهلِ ايمانڭ أللرينه يتيشمه‌سيله، إلى يوم القيام او أنوارڭ توسّعنه و نشرينه حياتنى فدا ايدن و ايده‌جك أربابنڭ تكثيرينى إحسان بيورسون. آمين! آمين بِحُرْمَةِ سيّد المرسلين

سَوْگيلى استادم ياريم ياشمڭ ترجمان اولديغى شو عريضه‌مه، ياريم نظرله باقوب عفوِِ قصور بيورماڭزى ديلر، أل و أتكلريڭزدن اوپر، بزه و بتون عالمه وسيلۀِ حيات اولان استادم، جنابِ حق سزدن أبديًا راضى اولسون، دعاسنى گيجه و گوندوز نياز أيلرم