بو دفعه گوندرمش اولديغڭز غوثِ گيلانى حضرتلرينڭ إخبارِ غيبيسى، چوق شايانِ حيرت و تأمّل بر مسئلۀِ مهمّه‌در. بيوك ذوقِ روحانى ايله اوقومقله برابر، فقير طلبه‌ڭز بونى چوقدن حسّ ايتمشدم. استاديمزڭ بو زمان ايچون مهمّ بر وظيفۀِ معنويه‌سى وار؛ لٰكن هنوز إفشا ايتمييور، مكتوم طوتويور فكرنده‌يم و بو فكريمى بعض خالص قارداشلريمه ده سويله‌مشدم. گچن سنه صبرى أفندى‌يه يازمش اولديغڭز مكتوبلرڭ برنده ده شو فقره‌يى گورمشدم: ”إمامِ ربّانى، صوڭ زمانلرده برى گله‌جك، ايمان مسئله‌لرينى غايت واضح بر صورتده نشر و إعلان ايده‌جك. بو سزڭ هيچ أندر هيچ قارداشڭز، حاشا كنديمى او آدم ظن ايده‌جك دگلم، يالڭز او بيوك آدمڭ بر پيشدار نفرى اولديغمى ظن ايدييورم. سن بندن او ذاتڭ قوقوسنى حسّ ايدييورسڭ.“ بو فقره أوّلكى دوشونجه‌مى تقويه ايتدى و كمالِ سرورله گلوب خسروه دخى سويله‌دم. استاديمزڭ رتبۀِ معنويه‌سنى آڭلاديغمزدن چوق سَوينمشدك. بوندن درت بش آى أوّل ده زيارتِ عاليڭزه گلديگمده استاديمز حقّنده صورمش اولديغم سؤاله ويرديگڭز جواب، كذالك أوّلكى قناعتلريمى تأييد و تقويه ايتدى. او زمان يالڭز بر ايكى كيشى بيلييوردق. شيمدى، بو رساله‌نڭ نشريله خاص طلبه‌لرڭ هپسى واقف اولمش اولويور. سروريمزه پايان يوقدر. دينسزلگڭ منتشر اولديغى شو زمانده بولونديغمزه أوّلجه تأسّف ايدييوردق. شيمدى هيچ تألّم، تأثّر أثرى قالمادى. ذاتِ عاليلرى گبى بر استادى بولديغمزدن، زمان نه اولورسه اولسون بزى مأيوس ايتمييور. جنابِ اﷲ طولِ عمر إحسان بيورسون. داها بزلره چوق ذوقلى أثرلر اوقوته‌جغڭزه أمينم. مساعده‌ڭزله شونى ده علاوه ايده‌يم كه، سزڭ داها خارقه وظيفۀِ معنويه‌ڭز وار. زمان گله‌جك رمزلرله، إشاراتِ قرآنيه ايله اويله خبر ويره‌جكسڭز كه؛ (حاشيه) بونلرى ده گچه‌جك و بزلرى شاشيرتوب بيراقه‌جقدر.