أثر، أمثالى گبى نورلى و حكمتليدر. إن شاء اﷲ تمنّى بيورديغڭز وجهله اُمّتِ محمّدڭ إجتماعى و پك مهمّ بر ياره‌سنه قطعى دوا اولور. طوغريدن طوغرى‌يه نورِ قرآن اولان مبارك سوزلرڭ قصد و إشارت ايديلمك ايسته‌نيلديگنى عرض ايتدم و مقامِ تصديقده شيمدى‌يه قدر كنديسنه بر قاچ سوزى ده اوقودم و إمكان بولدقجه ده اوقويه‌جغم. لاَ يُعَدّ وَ لاَ يُحْصٰى نعمِ سبحانيه‌سنه مظهر اولديغم اﷲ ذو الجلال تبارك و تعالى و تقدّس حضرتلرينه حمد و شكردن عاجز، عصيان ايله آلوده ايكن ذاتِ استادانه‌لرى بزى إذنِ ربّانى ايله او مبارك منوّر سوزلر ايله إرشاد ايدوب ظلمتدن نوره چيقارديڭز

تحرّئِ حقيقت ايله عمر گچيرر ايكن مقدّرات بو عاصى بيچاره‌يى ده بش سنه أوّل شاهِ نقشبند حضرتلرندن محمّد الكفروى حضرتلرينه طوغرى آچيلان طريقِ نقشبندى‌يه إدخال أيله‌مشدى. صوڭره موقّت بر كسوف نتيجه‌سى اولارق يول غائب اولمش، ظلمت و ديكنلر ايچنده قالينمش ايكن نورلى سوزلريڭزله ظلمتدن نوره، گيردابدن سلامته، فلاكتدن سعادته چيقدم. {اَلْحَمْدُ ِﷲِ هٰذَا مِنْ فَضْلِ رَبِّى} فرمان بيورويورسڭز كه: ”ايمانى قورتارمق زمانيدر.“ {عَلَى الرَّاْسِ وَالْعَيْنِ}

بو دفعه بو بيچاره طلبه‌سنه إحسان ايتديگى هديه‌يى، غيابى محبلرندن فتحى بك إسمنده‌كى قومشومزله اوقويورم. باشدن باشه معجزۀِ كبراىِ أحمديه‌يى إعلان ايدن اون طوقوزنجى مكتوبڭ تخصيصًا بنده‌لرينه إرسالى، يڭيدن حياته عودت ايتمش قدر مؤثّر اولمش و مطالعه‌سى رقّت طمارلريمى تحريك ايده‌رك خيلى جدّى گوز ياشى آقيتمغه وسيله اولمشدر