روحى، فضاىِ كائناتده بَيْن الأجرام سيرِ سريع ايله سياحت ايتديره‌جك طرزده طلوع ايدن منظومۀِ حقيقت، بِالخاصّه بزلر ايچون بيوك مظهريتدر. طريقِ نقشى حقّنده‌كى فقره‌يه مقابل ”طريقِ عجز و فقر و شفقت و تفكّر“ڭ حسابنه طلوع ايدن فقره ده پك چوق قيمتلى بر جوهردر. بو سوزلر آلتون ايله يازيلسه لايق ايكن ناقص خطّمله إستنساخ ايتدم. او حالده قيمتى، عاجز بر طلبه‌ڭزڭ يادگارى اولماسنده‌در

ثانيًا: شو زمانِ عصيان و طغيان و كفرانده محضِ عنايت و لطفِ حق اولان، اُمّتِ إسلاميه‌يى حقائقِ ايمانيه‌يه سَوق و إرشاده مأمور ايديلن ذاتِ حكيمانه‌لرينى بتون اُمّتِ محمّديه‌يى اولديغى گبى بو عاجزى ده نورلى سوزلر ايله طريقِ نوره إرشاد بيورديغڭزدن طولايى حرمت و منّتله دائم ياد ايدر، دنيوى و اُخروى مرادلريڭزى حاصل أيله‌مسنى رحيم، كريم اولان اﷲ ذو الجلال حضرتلرندن عبيدانه نياز و إسترحام أيلرم، أفنديم

(قارداشمڭ بر فقره‌سيدر)

أللريڭزى اوپر، دعاڭزى ايسترم. دنيادن طارغين، نفسنده عاجز اولان عبد المجيده گوزل بر استاد، علوى بر مرشد اولاجق يڭى أثرلريڭز گلدى. لفظى بر استادى غائب ايتدمسه ده، معنوى متعدّد مرشدلرى بولدم دييه كنديمى تبشير ايتدم. حقيقةً إرشاد ايده‌جك نورلى أثرلردر. اﷲ چوق راضى اولسون

أوت، متسلّى اولديغم ايكى جهت وار. برى: ألمزده‌كى مبارك سوزلر واسطه‌سيله دائما صحبتِ معنويده بولونديغمز، ديگرى: محبّتمزڭ عنايتِ بارى ايله ”حبِّ فِى اﷲ“ مرتبه‌سنده اولديغنه ايمانمزدر. بناءً عليه سزه بنم بوگون و يارين أڭ بيوك هديه‌م: ويرديگڭز درسى، نامڭزه اولارق وكالةً على قدر الإمكان مؤمنلره تبليغ أيله‌مك و اللّٰهڭ ويرديگى حقيقى محبّتى أبدًا طاشيمق و بوڭا مقابل أرحم الراحمين و أكرم الأكرمين، اَحْسَنُ الخالقين، ربِّ رحيم و كريم حضرتلرندن، حقيقى محبّتڭ اوتوز ايكنجى سوزڭ اوچنجى موقفنده ايضاح بويوريلان نتيجه‌سنه مظهر بيورلمقدر. ايمانِ تحقيقى يولنده بولوشديغمز حقّى أفندى ايله نيّتمز حقّه، صدقه، إخلاصه إشتراكمز محقّقدر