رسالة النور، مكتوبات النورڭ مطالعه‌سى، تحرير ايديلمسى، باشقه‌لره نشر و تبليغه على قدر الإستطاعه چاليشيلماسى گبى أمرِ خيرِ عظيمه حول و قوّتِ صمدانى و عنايت و لطفِ ربّانى ايله موفّق اولديغم زمانلر كه؛ بو أوقاتده أوّلاً و بِالذّات بو فقير إستفاده، إستفاضه، إستعانه ايتمش اولويور. بو إعتبارله مذكور ساعتلرى چوق مبارك طانييور، فراقنه آجييور، او ياشايشڭ دوامنى، تكرارينى، كسيلمه‌مسنى أز جان و دل آرزو ايدييورم

فقط نه چاره كه؛ إغتنام ايده‌بيلديگم قيصه‌جق وقتلرده ذهنمى صافيلشديروب نورلرڭ قارشيسنه، طولاييسيله قرآنڭ معجزه‌لرى مجموعه‌سنه و عزيز، محترم استاديمڭ مدرسه‌سنه و اول سيّد الكَونين پيغمبريمز أفنديمز (ع‌ص‌م) حضرتلرينڭ روضۀِ سعادتلرينه و نهايت ربّ العالمين تعالى و تقدّس حضرتلرينڭ حضورِ لامكانيسنه چيقييورم. بو سببله جدًّا او نورلرله إشتغال ايتمديگم زمانلر، كاشكه أنفاسِ معدودۀِ حياتدن اولميه ايديلر دييورم

گچن هفته مختلف ايكى جماعته يگرمى دردنجى مكتوبڭ برنجى و ايكنجى ذيللرينى اوقودم. ديڭله‌ينلر حيران و بو فقير ده او پارلاق إعجازِ قرآندن عادتا غشى اولدم. بو أثريڭزى رسالۀِ نور و مكتوبات النورڭ أڭ منوّرلرى صفنده مطالعه ايدييورم. بوگون جمعه ايدى. قومشومز فتحى بگه اون بر و اون اوچ نومرولى سوزلرى اوقودم. دنيوى ايشلردن تخليصِ نفس ايله إغتنام ايده‌بيلديگم وقتلرده، او مبارك نورلى پنجره‌لره قوشويورم. روحى و معنوى غدامى آلمغه و بولابيلديگم بويله بر مخاطبى ده حصّه‌دار ايتمگه چاليشييورم