(شو فقره قارداشم عبد المجيدڭدر)

بو أثرلر بتون صنفلره و جماعتلره دائما مظهرِ تقدير اولويور. كيم گورسه إستحسان ايدر. تنقيده معروض اولاجق أثرلر دگل. فقط درجاتِ تقدير، درجاتِ فهم گبى متفاوت و متعدّددر. هركس درجۀِ فهمنه گوره تقدير ايده‌بيلير

(خلوصى بگڭ سلفى، يگرمى آلتى ياشنده وفات ايدن برادرزاده‌م عبد الرحمانڭ، وفاتندن بر ايكى آى أوّل يازديغى مكتوبدر)

أللريڭزدن اوپر، دعاڭزى ديله‌مكده‌يم. صحّت خبريڭزى، إرشاد ايديجى اولان اوننجى سوز رساله‌ڭزله برابر تحسين أفندى واسطه‌سيله آلدم. چوق تشكّر ايدرم. أوّلجه گرچه أمريڭزه مخالفت ايده‌رك محترم و دگرلى عموجه‌مدن آيريلديغمه پشيمان اولمش ايسه‌م ده و عتابڭزه مستحق اولمش ايسه‌م ده، بو ده مقدّر ايمش. و جنابِ حقّڭ أمر و إراده‌سيله و بلكه ده بزم ايچون خيرلى اولديغى ايچون اولدى. بناءً عليه بن جهالت سائقه‌سيله بر قصور ياپدم و بلاسنى ده چكدم. بوندن صوڭره چكمه‌مك ايچون عفويڭزى رجا و دعاڭزى ديلرم