يگرمى آلتنجى مكتوبى بيوك سَوينجله آلدم. دفعاتله، دقّتله، مراقله، محبّتله، لذّتله اوقودم. و نتيجه‌ده ”دعاڭز اولمازسه نه دگريڭز وار“ فرمان بيوران ذاتِ ذو الجلاله عبوديتله إنتسابم حسبيله و عبديتڭ تضمّن ايتديگى لسانله، كمالِ عجز و فقر و شوقله؛ تمامًا حسبى، بتون معناسيله اﷲ نامنه، بتون وضوحيله أهلِ ايمان و قرآن نفع و حسابنه اولان مادّى، معنوى، ظاهرى، باطنى، دنيوى، اُخروى خدماتڭزڭ مكافاتنى لطف و كرمِ بى‌نهايه‌سنه مناسب بر طرزده إحسان و إكرام بيورمسنى و ذاتِ استادانه‌لرينى هر ايكى جهانده عزيز ايتمسنى اول خالقِ رحيم و كريم حضرتلرندن عبيدانه تضرّع و نياز أيلدم. اميدم {اُدْعُونِى اَسْتَجِبْ لَكُمْ} فرماننڭ تجلّى ايده‌جگنده‌در

محترم استاد! ذاتًا سزڭ، بز بيچاره‌لردن بكله‌ديگڭز يالڭز دعا دگل مى؟ مبارك سوزلر حقّنده شيمدى‌يه قدر مكتوبلرمده موجود اولان إحتساساتمى ناطق، سونوك إفاداتمى رسالة النوره تقريض ياپمق خصوصنده‌كى نيّتِ استادانه‌لرينه بر شى ديمگه حقّم يوق. فقط بنم او پريشان إفاده‌لرم، گونشڭ ياننه موم ياقمق قبيلندن اولاجق و محتملاً حقيقتده‌كى سونوكلگنه رغمًا او نورلرڭ قومشولغندن، آيينه‌دارلغندن حصّه‌مند اولارق نسبى بر پارلاقلق عرض ايده‌بيله‌جكدر

رسالة النورڭ مستمعلرى آراسنده، سلطان عبد الحميدڭ دورنده كربلاده سنه‌لرجه مدرّسلك خدمتنده بولونمش اولان حاجى عبد الرحمٰن أفندى نامنده سكسان سكز ياشنده بر خواجه واردر. هر دفعه‌كى مطالعه‌دن بيوك ممنونيت گوسترمكده، ”چوق إستفاده ايتدم، اﷲ راضى اولسون“ ديمكده و چوق دعا ايتمكده‌در. يگرمى آلتنجى مكتوبڭ اوچنجى مبحثنى غيرِ إختيارى مختلف رتبه‌ده مهمّ ذاتلره اوقودم. هپسى ”چوق طوغرى، چوق گوزل“ ديديلر. أوت بو فقير چوق تجربه ايتدم و يقين حاصل ايتدم كه: {وَ قُلْ جَاءَ الْحَقُّ وَ زَهَقَ الْبَاطِلُ} (إلٰى آخر الاٰية) آيتنڭ لا يموت معجزه‌سى واردر. بو دفعه‌كى مكتوبلرى بر قاچ دفعه مختلف كوچك جماعتلره اوقومق نصيب اولدى. بونلرڭ برنده مهمّ بر عالم ده واردى. جمله‌سى حيرت و تقديرلرينى إظهار ايتديلر. بنم فكريمه گلنجه: بتون رسالة النور و مكتوبات النور، إحتياجِ زمانه گوره هر صنف أربابِ دين و حتّى مفرط معنّد اولمامق شرطيله، دينسزلرى بيله إلزام و إقناع ايده‌جك درجه‌ده‌درلر. فقط (دنيا بو) سَوقِ منفعت، حرصِ جاه، كفر و عناد، غفلت و كسل، شرك و ضلال گبى علاجسز خسته‌لقلره طوتولانلر ايچون، بو نورلره قارشى گوز يوممق، گورسه بيله قبول ايتمه‌مك، گورديگنى إنكار ايتمك، حق و حقيقتى ردّ ايتمك گبى ديوانه‌لكلر إستبعاد ايديله‌مز. معلومِ فاضلانه‌لرى، اللّٰهڭ شو موقّت مسافرخانه‌سنده إنسان صورتنده حيوانلرى أكسيك دگلدر. بو نورلر إنتشار ايتسه ايدى، ألبته بويله‌لرينڭ بوگون إستدلالاً درميان ايديلن ديوانه‌لك هذيانلرى ده آچيق اولارق گورولوردى