اوچنجى أساس: {لاَ يَعْلَمُ الْغَيْبَ اِلاَّ اﷲُ} شو مسئله‌ده شيمديلك دليلنى گوستره‌ميه‌جگم بر مدّعايى بيان ايدييورم. شويله كه: شو دنيانڭ بر عمرى و شو دنياده‌كى كُرۀِ أرضڭ دخى اوندن قيصه ديگر بر عمرى و كُرۀِ أرضده ياشايان نوعِ إنسانڭ داها قيصه بر عمرى واردر. بو بربرى ايچنده اوچ نوع مخلوقاتڭ عمرلرى، ساعتڭ ايچنده‌كى دقيقه، ثانيه، ساعتلرى صايان چرخلرڭ نسبتى گبيدر. نوعِ إنسانڭ عمرى، كُرۀِ أرضڭ ايكى حركتيله حاصل اولان معلوم أيّام ايله اولديغى گبى؛ ذى‌حياتڭ وجودينه مظهر اولديغى زماندن إعتبارًا كُرۀِ أرضڭ عمرى ايسه مركزِ إرتباطى اولان شمسڭ حركتِ محوريه‌سيله حاصل اولان أيّام ايله اولماسى حكمتِ ربّانيه‌دن اوزاق دگلدر. و دنيانڭ عمرى ايسه شمس الشموسڭ حركتِ محوريه‌سى ايله حاصل اولان أيّام ايله‌در.

شو حالده نوعِ إنسانڭ عمرى يدى بيڭ سنه أيّامِ معلومۀِ أرضيه ايله اولسه، كُرۀِ أرضڭ حياته منشأ اولديغى زماندن خرابيتنه قدر أيّامِ شمسيه ايله ايكييوز بيڭ سنه‌دن گچر. و شمس الشموسه تابع و عالمِ بقادن آيريلوب كره‌مزه باقان دنيالرڭ عمرى (شمس الشموسڭ إشاراتِ قرآنيه ايله هر بر گونى أللى بيڭ سنه اولماسيله) يدى بيڭ سنه او أيّام ايله يوز يگرمى آلتى ميليار سنه ياشارلر. (حاشيه) ديمك أيّامِ شرعيه تعبير ايتديگمز أيّامِ قرآنيه‌ده بونلر داخل اولابيليرلر. أوت سماوات و أرضڭ خالقى، سماوات و أرضه باقان بر كلاميله، سماوات و أرضڭ سببِ خلقتى و چكردكِِ أصليسى و أڭ مكمّل آخر ميوه‌سى اولان بر ذاته خطابنده، او أيّاملرى إستعمال ايتمك، قرآنڭ علويتنه و مخاطبنڭ كمالنه ياقيشير و عينِ بلاغتدر.... {وَ الْعِلْمُ عِنْدَ اﷲِ ❊ وَ اﷲُ اَعْلَمُ بِاَسْرَارِ كِتَابِهِ}