عينًا بونڭ گبى؛ جنابِ حق سڭا إباحه صورتنده ويرديگى حياتى إنتحار ايله خاتمه چكه‌مزسڭ، گوزيڭى چيقارامازسڭ و معنًا گوزى كور ايتمك ديمك اولان گوزى ويرنڭ رضاسى خارجنده حرامه صرف ايده‌مزسڭ. و هكذا قولاغى و ديلى و بونلر گبى جهازاتى حرامه صرف ايتمكله معنًا ئولديره‌مزسڭ. و أتى ينيلمه‌ين حيوانڭى لزومسز تعذيب ايدوب قتل ايده‌مزسڭ. و هكذا.

بتون سڭا ويريلن نعمتلر، بو مسافرخانۀِ دنيانڭ صاحبى اولان مهماندارِ كريمِ ذو الجلالڭ قوانينِ شريعتى دائره‌سنده تصرّف ايتمك گركدر.

عزيز قارداشم رأفت بك!

سنڭ مكتوبڭى و كتابڭى ممنونيتله آلدم. غايت سَوْديگم بر طلبه‌م اولان خلوصى بگڭ روحنى سزده حسّ ايتدم. سنى يڭى دگل، خلوصى گبى أسكى بر طلبه اولارق قبول ايتدم. طلبه‌لگڭ خاصّه‌سى شودر كه، يازيلان سوزلره كندى مالى گبى صاحب اولماليدر. كنديسى تأليف ايتمش و يازمش نظريله باقوب، نشرينه و أهل اولانلره إبلاغنه چاليشمقدر. ما شاء اﷲ خطّڭ گوزلدر. وقت بولورسه‌ڭ بر قسمنى يازڭ. بر قسمنى خسرو گبى جدّى طلبه‌لر يازار، اونلردن بِالآخره آلير يازارسڭز و اونلرله تشريكِ مساعى ايدرسڭز. آلتى سنه‌در إسپارطه‌ده جدّى طلبه‌لرڭ چيقماسنه منتظردم، بكله‌يوردم. اَلْمِنَّةُ ِﷲ، شيمدى سزڭ ايله برابر بر قاچ دانه چيقمغه باشلادى. چونكه بر طلبه، يوز دوسته مرجّحدر. سوزلر نامنده‌كى أنوارِ قرآنيه ايسه، أڭ مهمّ عبادت اولان عبادتِ تفكّريه نوعندندر. شو زمانده أڭ مهمّ وظيفه، ايمانه خدمتدر. ايمان سعادتِ أبديه‌نڭ آناختاريدر.