نوحه يازديغم گبى سزه ده دييورم كه: أسكيده بر ذات، حقسز بر مسلگى حق ظن ايده‌رك، اوندن آلديغى بر محبّت ايله، ديرى ايكن دريسنڭ صويولديغنه تحمّل ايده‌رك، قهرمانانه بر طور گوسترديگى گبى؛ عجبا عينِ حق و محضِ حقيقت و بتون أنوارِ حقائقڭ منبع و معدنى اولان حقيقتِ قرآنيه‌يه خدمتمزده‌كى قدسى لذّت، بو ملحدلرڭ موقّت، أهمّيتسز إزعاجلرينه و قلبمزده آچدقلرى ياره‌لره ترياق و مرهم اولاماز مى؟ ألبته اولور و اولمش و اولويور

ثانيًا: يمن إمامى اولان زيديلر سيّدى حقّنده‌كى سؤالڭز حقيقةً أهمّيتلى و يمنليدر. فقط ميمنتسز بر زمانه راست گلدى. هم ذهنم قپالى، هم حال مساعد دگل، هم و هم... يالڭز بو قدر وار كه، مشهور ”إمامِ زيد“ ساداتِ عظيمه‌دن و أئمّۀِ آلِ بيتدندر. و مفرط شيعه‌لرى ردّ ايدن و {اِذْهَبُوا اَنْتُمُ الرَّوَافِضُ} دييوب حضرتِ أبو بكر و حضرتِ عُمَردن تبرّى‌يى قبول ايتمه‌ين و او ايكى خليفۀِ ذى‌شانى حرمت ايدوب قبول ايدن بر ذاتدر. اونڭ أتباعلرى، شيعه‌لرڭ أڭ معتدلى و أڭ سنّيسيدر. بونلر هم أهلِ إنصاف و هم چابوق حقّى قبول ايدر بر طائفه‌در. إن شاء اﷲ وهّابيلرڭ تخريباتنى تعميره سبب اولدقلرى گبى، أهلِ سنّت و جماعتدن زيديلرڭ إنحرافلرى دخى إستقامت كسب ايدوب، أهلِ سنّته إلتحاق ايدوب إمتزاج ايده‌جكلر. بو آخر زمان چوق چالقالانييور، بو فتنۀِ آخر زمان عجيب شيلر طوغوره‌جغنى إحساس ايدييور

رساله‌لرله علاقه‌دار آرقداشلره سلام و بدر الدين و همشيره‌مه و حاجى إبراهيمه دعا ايدييورم