عزيز، صدّيق، مدقّق آخرت قارداشم و متفكّر و حقيقتلى آرقداشم رأفت بك

أوّلا: مكتوبڭزده رسالۀِ نورڭ ميزانلرينى هر اوقودقجه، داها زياده إستفاده ايتديگڭزى يازييورسڭز. أوت قارداشم، او رساله‌لر قرآندن آلينديغى ايچون قوت و غدا حكمنده‌در. هر گون إحتياج غدايه حسّ ايديلديگى گبى، هر وقت بو غداىِ روحانى‌يه إحتياج حسّ ايديلير. سنڭ گبى روحى إنكشاف ايدوب، قلبى إنتباهه گلن ذاتلر اوقومقدن اوصانماز. بو قرآنى رساله‌لر، سائر رساله‌لر گبى تفكّه نوعندن دگل كه، اوصانج ويرسين. بلكه تغدّيدر

ثانيًا: غوثِ أعظم گبى، مماتدن صوڭره حياتِ خضرى‌يه ياقين بر نوع حياته مظهر اولان أوليالر واردر. غوثڭ خصوصى إسمِ أعظمى ”يا حىّ“ اولديغى سرّيله، سائر أهلِ قبوردن فضله حياته مظهر اولديغى گبى؛ غايت مشهور معروفِ كرخى دينيلن بر قطبِ أعظم و شيخ حيات الحرّانى دينيلن بر قطبِ عظيم، حضرتِ غوثدن صوڭره مماتلرى حياتلرى گبيدر. بَيْن الأوليا مشهور اولمشدر

ثالثًا: تنكه‌جى محمد أفندينڭ حفظِ قرآنه چاليشمق نيّتى چوق مباركدر. جنابِ حق اونى موفّق ايتسين. ألمزدن گلديگى قدر دعا ايله يارديم ايده‌جگز. قرآنِ عظيم الشانڭ هر بر حرفنڭ أقلّى اون حسنه اولمقله برابر؛ تكرّر ايتدكجه و مبارك وقتلره راست گلدكجه و مَلك و سائر ذى‌شعور روحانيلر قرائتنى ديڭله‌دكجه هر بر حرفى اويله بر چكردك اولور كه، حسنات جهتندن اويله بر معنوى سنبل تشكّل ايدر كه؛ او سنبلڭ دانه‌لرى، تكلّم وقتنده آغزدن چيقان بر كلمه‌نڭ هوانڭ طالغه‌لرينڭ آيينه‌لرنده تمثّل ايدن ميليونلرجه او كلمه گبى كلمه‌لرڭ عددينه بلكه مساوى گلير. بويله هر بر حرفى بر خزينۀِ أبديه‌نڭ بر آناختارى اولابيلير بر قدسى كلامى قلبنده يازمق، نه قدر مقدّس بر خدمت اولديغى آشكاردر. إن شاء اﷲ بدر الدين چوقلره بر حسنِ مثال اولاجقدر، داها چوقلرينى حفظِ قرآنه سوق ايده‌جكدر