ايشته كندى خطّمه مقابل، سڭا ايكى نكته سويله‌دم. إن شاء اﷲ باشقه بر وقت سنڭ خاطرڭ ايچون بيوك زحمت چكوب بر قاچ سطر يازاجغم. غالب بگڭ ايكى ألى وار؛ صاغ ألنى بڭا ويرمش، بنم حسابمه يازييور، صول ألى ده كندينه قالمش. بو مكتوب او ايكى أل ايله يازيلمشدر. حاضر مسعود، غالب و سليمان أفنديلر، مصطفى چاوش، عبد اﷲ چاوش سلام ايدييورلر. بن ده باشده خسرو، بكر بك عموم قارداشلريمزه سلام ايدييورم. بِالخاصّه قاين پدريڭز حاجى إبراهيم بگه و محترمه همشيره‌مه و مبارك بدر الدينه چوق دعا ايدييورم

عزيز، صدّيق، مدقّق آخرت قارداشم، خدمتِ قرآنيه‌ده آرقداشم

أوّلا: مكتوبڭزده، بنم هر مكتوبمڭ باشنده {وَاِنْ مِنْ شَيْءٍ اِلاَّ يُسَبِّحُ بِحَمْدِهِ} يازيلماسنڭ حكمتنى صورييورسڭز. بونڭ حكمتى شودر كه: قرآنِ حكيمڭ خزائنِ قدسيه‌سنه، بڭا آچيلان أڭ برنجى قپو او اولديغيدر. أڭ أوّل حقائقِ عاليۀِ قرآنيه‌دن، شو آيتڭ حقيقتى بڭا ظاهر اولمش و أكثر رساله‌لرده، او حقيقت سريان ايتمشدر

هم بر حكمتى شودر كه؛ إعتماد ايتديگم مهمّ استادلريمڭ مكتوبلرينڭ باشلرنده إستعمال ايتمه‌لريدر.

هم مكتوبڭزده ”يدى كبائر“ى صورييورسڭز. كبائر چوقدر، فقط أكبر الكبائر و موبقاتِ سبعه تعبير ايديلن گناهلر يديدر: ”قتل، زنا، شراب، عقوقِ والديْن (يعنى قطعِ صلۀِ رحم)، قمار، يالانجى شهادتلك، دينه ضرر ويره‌جك بدعه‌لره طرفدار اولمق“در.

ثانيًا: بو ياز موسمنده حقائقِ قرآنيه‌يه نسبةً، ميوه‌لر حكمنده توافقاته دائر، حروفاتِ قرآنيه‌نڭ نكته‌لرينى بيان ايدييوردق. شيمدى موسم دگيشمش، حروفدن زياده حقائقه إحتياج واردر. گله‌جك يازه قدر موقّةً او قپويى إختياريمزله چالميه‌جغز. فقط او حروفه عائد بيانات نه درجه حق اولديغنى، مولانا جامى‌نڭ ديوانيله قارداشلرمله تفأل ايتدك. ديدك: يا جامى! بو حروفاتِ قرآنيه‌يه دائر بيان ايتديگمز نكته‌لره نه ديرسڭ؟ بر فاتحه اوقويوب فالى آچدق. ايشته باشده فال شو گلدى