حاجى إبراهيم أفندى‌يه بِالخاصّه سلام ايدييورم. لطفى، رشدى، حافظ أحمد، سزائى أفنديلره سلام ايدييورز. آخرت همشيره‌مه ده دعا ايدييورم. سنڭ بو دفعه‌كى مكتوبڭ بر پارچه‌سى مكتوبات ايچنه درج ايديلدى.

بو دفعه إستنساخ ايتديگڭز رساله‌لر چوق گوزل اولمشدر. سنڭ غيرت و صميميت و جدّيتڭى بڭا گوسترديلر و رأفت تنبل دگلدر، إثبات ايتديلر. اونلرى تصحيح ايدوب گوندرمشدم. صوڭره ايشيتدم كه، گتيرن آدم إسلام‌كوينده بيراقمش. اوتوز برنجى مكتوبڭ اوچنجى، دردنجى لمعه‌لرينى يازمغه وقت بولامادم. قورقويورم كه اونلرڭ ده {اِذَا جَاءَ نَصْرُ اﷲِ} سرّى گبى، موسمى گچه‌رك صوڭره گوزل يازيلمامش اولسون. إن شاء اﷲ سزلرڭ إشتياقى بنى چاليشديره‌جق. فقط بو شهورِ ثلاثه چوق قيمتداردر؛ ليلۀِ قدرڭ سرّيله سكسان سنه بر عمرى قزانديره‌جق بر وقتده، أڭ ايى، أڭ أفضل شيلرله مشغول اولمق لازم گلييور. إن شاء اﷲ قرآنه عائد مسائلله إشتغال، بر نوع معنوى متفكّرانه قرآن اوقومق حكمنده‌در. هم عبادت، هم علم، هم معرفت، هم تفكّر، هم قرائتِ قرآن معنالرى رساله‌لرڭ إستنساخ و مطالعه‌لرنده واردر إعتقادنده‌يز. ذاتًا بو جهتى سز تقدير ايتمشسڭز

معجزاتِ أحمديه‌يى سزڭ ايچون يازديردم، تكميل اولدى. فقط باشقه بر نسخه اوڭا گوره يازديرمق لازم اولديغى ايچون موقّةً بوراده قالا‌جق. سنڭ مكتوبڭده حافظ سزائى بزمله جدّى علاقه‌دار اولديغنى گوسترييور. بن بر زمان ايدى، آغروسلى ذكائى گبى صميمى، حرارتلى إسپارطه‌ده يڭى بر قارداشمز بولونه‌جق، وجدانًا حسّ ايدييوردم. إن شاء اﷲ بو سزائى، او اولاجق. بن اونى ايشيتديگم وقت، حسّ ايتديگم شخص توهّم ايتدم. أگر تصوّرم گبى ايسه ذاتًا ايى، اولماسه اويله اولمغه چاليشسين. أگر ذكائى ناصل آدمدر مراق ايدرسه، يگرمى يدنجى مكتوبڭ فقره‌لرنده ذكائينڭ ماهيتنى و نه درجه صميمى اولديغنى گوسترر فقره‌لرى وار، باقسين