ما شاء اﷲ شيمدى سز اُميد ايتديگم طرزده رساله‌لرى تعقيب ايدييورسڭز و يازييورسڭز. سنڭ گبيلرڭ آز سعيى دخى چوق حكمنده‌در. چونكه چوقلر سزه إعتماد ايدوب، سزى تقليد ايدر. سزڭ گبى جدّى قارداشلرى، بو غربت مملكتنده بولديغمدن، بوراسى بنم ايچون حقيقى بر وطن حكمنه گچدى، حقيقى وطنمى اونوتديردى. يازيلان أثرلرڭ يوكسكلگى، مأخذ و معدنِ قدسيلرى اولان قرآندن صوڭره سزلر گبى مخاطبلرڭ جدّى إشتياقلرى و تام تفهّملريدر. سز بنى بولديغڭزدن بر شكر ايتسه‌ڭز، بن سزى بولديغمدن طولايى بيڭ شكر ايدييورم.

مكتوبڭده إسمِ أعظمى سؤال ايدييورسڭ. إسمِ أعظم گيزليدر. عمرده أجل، رمضانده ليلۀِ قدر گبى، أسماده إسمِ أعظمڭ إستتارى مهمّ حكمتى وار. كندى نقطۀِ نظرمده حقيقى إسمِ أعظم گيزليدر، خواصّه بيلديريلير. فقط هر إسمڭ ده أعظمى بر مرتبه‌سى وار كه، او مرتبه إسمِ أعظم حكمنه گچييور. أوليالرڭ إسمِ أعظمى آيرى آيرى بولماسى بو سردندر. حضرتِ على‌نڭ (رض) أرجوزه نامنده بر قصيده‌سى مجموعة الأحزابده وار. إسمِ أعظمى آلتى إسمده ذكر ايدييور. إمامِ غزالى اونى جُنَّتُ اْلأسماء نامنده‌كى رساله‌سنده، حضرتِ على‌نڭ ذكر ايتديگى و إسمِ أعظمڭ محيطى اولان او أسماءِ ستّه‌يى شرح و خاصّه‌لرينى بيان ايتمشدر. او آلتى إسم ده، {فَرْدٌ ❊ حَىٌّ ❊ قَيُّومٌ ❊ حَكَمٌ ❊ عَدْلٌ ❊ قُدُّوسٌ} در.

كرامتِ غيبيه‌نڭ ايكنجى پارچه‌سنى تصحيح ايده‌رك، بر پارچه داها علاوه ايتدك، گوندردم.

بدر الدينڭ سرعتله ايلرى گيتمسى، قرآنِ حكيمڭ فيضِ كرامتندندر. جنابِ حق موفّق ايتسين.