ثانيًا: بدر الدينى بوراده ديڭله‌مك آرزو ايدييوردم، وقت مساعده ايتمدى. بن معنًا اوراده خيالاً ديڭله‌يورم. إن شاء اﷲ أولادلق مرتبه‌سندن طلبه‌لك مرتبه‌سنه گيدييور.

ثالثًا: بنم كندى خطّمله مكتوب ايسته‌يورسڭ. بر دوداقسز آدمه، لامبايى اوفله سوندور ديمشلر. ديمش: أڭ زحمتلى ايشى بڭا گوسترييورسڭز، ياپميه‌جغم

بلى، جنابِ حق بڭا حسنِ خط ويرمه‌مش، هم بر سطر يازمق بڭا بيوك بر ايش گبى اوصانج ويرييور. أسكيدن بَرى دييوردم: يا ربّى! بن او قدر محتاج ايكن و نظمى سَوركن، بو ايكى نعمت بڭا ويريلمدى، دييه تشكّى دگل، تفكّر ايدييوردم. صوڭره بڭا قطعى تبيّن ايتدى كه، شعر و خط بڭا ويريلمه‌مكده، بيوك بر إحسان ايمش

هم او خطّه إحتياجمى سزڭ گبى قلم قهرمانلرينڭ معاونتلرى تأمين ايدييور. خطّ بيلسه ايدم، خطّه إعتماد ايدوب، مسائل روحده قرارلايه‌رق نقش ايديلميه‌جكدى. أسكيدن هانگى علمه باشلادم، خطّم اولماديغى ايچون روحمه يازاردم. فوق العاده بر مَلكه إحسان ايديلدى.

شعر ايسه چندان قيمتدار، شيرين بر واسطۀِ إفاده‌در. فقط شعرده خيال حكم ايتديگى ايچون حقيقته قاريشير، حقيقتلرڭ صورتنى دگيشديرر. بعضًا حقيقت بربرينه گچر. خالص حق و محضِ حقيقت اولان قرآنِ حكيمڭ خدمتنده إستقبالده بولونه‌جغمز مقدّر اولديغندن، قدرِ إلٰهى بر عنايت اولارق بزه شعر قپوسنى آچمادى. {وَمَا عَلَّمْنَاهُ الشِّعْرَ} سرّى بوڭا باقار