قاين پدرڭ حاجى إبراهيم أفندى‌يه چوق سلام ايدييورم. او ذاتى جدّى بر آخرت قارداشى تلقّى ايتمشم. إن شاء اﷲ سنڭ بو يڭى غيرت و سعيڭدن او ده حصّه‌داردر

بدر الدينڭ كوچكلگيله برابر، بيوك طلبه‌لر دائره‌سنه داخل ايتمشم. او، كوچكلرڭ بيوگيدر. و إن شاء اﷲ جنابِ حق اونڭ أمثالنى چوغالتسين. بدر الدينڭ والده‌سنه دعا ايدييورم. ألبته بدر الدينڭ حسنِ تربيه‌سنده أڭ مهمّ حصّه اونڭدر. چونكه، اونڭ أڭ برنجى استادى اودر

بكر آغا، لطفى أفندى، حافظ أحمد، سزائى گبى قارداشلره سلام ايدييورم

أوّلا: بو يڭى حادثه‌نڭ ماهيتنى مراق ايتمشسڭز، اورايه گلن ايكى اوزون مكتوب ماهيتنى گوسترييور. {وَمَنْ اَظْلَمُ مِمَّنْ مَنَعَ مَسَاجِدَ اﷲِ اَنْ يُذْكَرَ فِيهَا اسْمُهُ} آيتى او حادثه‌يه سببيت ويرنلرڭ باشنه صاعقه گبى اينييور و اينه‌جك. فقط بز عجولز. هر شيئڭ بر وقتِ معيّنه‌سى وار. {فَضُرِبَ بَيْنَهُمْ بِسُورٍ لَهُ بَابٌ بَاطِنُهُ فِيهِ الرَّحْمَةُ وَ ظَاهِرُهُ مِنْ قِبَلِهِ الْعَذَابُ} آيتنه ماصدق اولارق بو حادثه بزه قارشى وجهِ مرحمتله باقييور. ملحدلره قارشى اولان وجه، عذاب و قهر ايله نظر ايدييور. هر نه ايسه... جنّت اوجوز اولماديغى گبى، جهنّم ده لزومسز دگلدر.