و مادام بو آيتلرده، رسولِ أكرمه (ع‌ص‌م) ويريلن صفتلر و عنوانلر هر زمانده جريانى و هر بر عصرده حكم ايتمك حيثيتيله او عنوانلرڭ آلتنده معناىِ رمزيله رسالۀِ النور گبى او وظيفه‌يى يرينه گتيرن أثرلر و ذاتلر بو گبى آياتڭ دائرۀِ شموللرينه گيرملرى، قرآنده‌كى إعجازِ معنويسنڭ شأنيدر، بلكه مقتضاسيدر و لازميدر

مادام رسالۀِ النور، بو عجيب عصرده مستثنا بر صورتده بو آيتڭ إشارت ايتديگى وظيفه‌يى ياپييور و معناسنڭ دائرۀِ كلّيه‌سنده بر فرديدر. ألبته متعدّد أماره‌لر و گيزلى قرينه‌لر ايله دييه‌بيليرز كه؛ بو آيتده دخى برنجى شعاعڭ سائر اوتوز بر عدد آيتلرى گبى رسالۀِ النوره معناىِ إشاريله باقار. شويله كه

{لِيُخْرِجَكُمْ مِنَ الظُّلُمَاتِ اِلَى النُّورِ وَ كَانَ بِالْمُؤْمِنِينَ رَحِيمًا} جمله‌سى، معناىِ إشاريسيله دييور: ”بيڭ اوچ يوز يتمشه قدر تجاوز ايدن أڭ قراڭلق بر ظلم، أڭ قراڭلق بر ظلمتدن سزى أى أهلِ ايمان و القرآن! قرآندن گلن نورلره و ايمانڭ ايشيقلرينه چيقاران و إسمنده نور و معناسنده رحيميت بولونان و إسمِ نور و إسمِ رحيمڭ مظهرى اولان بر لمعۀِ قرآنيه‌يه و بو عصريمزه باقوب ايما ايدييور

معنا مطابقتندن باشقه بر أماره و قرينه‌سى بودر كه: {اِلَى النُّورِ وَ كَانَ بِالْمُؤْمِنِينَ رَحِيمًا} فقره‌سنڭ (شدّه و تنوين صاييلير) مقامِ جفريسى طوقوز يوز قرق يدى (٩٤٧) ايدوب، رسالة النور إسمنڭ مقامى اولان طوقوز يوز قرق يدى عددينه تام تامنه توافق ايدييور.

{اِنَّا اَرْسَلْنَاكَ شَاهِدًا وَ مُبَشِّرًا} جمله‌سى، (شدّه‌لر صاييلماز و آخرده تنوين وقفدر، ألف صاييلير) مقامِ جفريسى كه، بيڭ اوچ يوز يگرمى اوچ (١٣٢٣) تاريخنى گوسترر. او تاريخده، مركزِ خلافتده دهشتلى بر إنقلابڭ مبدأِ إنفلاقى ايچنده، يأسه دوشن أهلِ ايمانه مژده ويروب، إسلاميتڭ حقّانيتنه و قوّتنه قوّتلى شهادت ايدن و وراثتِ نبوّت نقطه‌سنده دعوتده بولونان حقيقى بر شاهده إشارت ايدر. {وَ نَذِيرًا وَ دَاعِيًا اِلَى اﷲِ} جمله‌سى، (حاشيه ١) (تنوينلر وقف اولماديغندن صاييليرلر) مقامِ جفريسى، بيڭ ايكى يوز أللى آلتى (١٢٥٦) تاريخنى گوسترمكله، بو عصرده و بو زمانده‌كى إسلاميتڭ إنخسافنى، بر عصر أوّل إحضار ايدن مقدّماتنه باقه‌رق، {وَ دَاعِيًا اِلَى اﷲِ} كلمه‌سى يوز طقسان بر (١٩١) ايده‌رك رسالۀِ النورڭ بر حقيقى إسمى اولان بديع الزمانڭ مقامِ جفريسى بولونان يوز طقسان بر (١٩١) عددينه تام تامنه توافقله ايما ايدر كه؛ رسالۀِ النور دخى، او إنخساف ايچنده بر ”داعئِ إلى اﷲ“در