باش وورديغم هر طبيبِ معنويدن آلديغم علاجلر، ياره‌مى تداوى‌يه، عقلمى إقناعه، لهفمى إسكاته كافى گلمدى. بِالضروره {قُلْ يَا عِبَادِىَ الَّذِينَ اَسْرَفُوا عَلٰى اَنْفُسِهِمْ} آيتِ جليله‌سنڭ مفهومنه توسّلاً، مألوف اولديغم دنائتلردن متحصّل قويو لكه‌لرى قلع و تطهيره و طريقِ حقده ثباته معين اولاجق بر رهبرى آراركن، اورته‌ده هيچ بر سببِ ظاهرى اولماديغى حالده، مملكتمدن قسطمونى‌يه نفيم شبهه‌سز، نفسمه گران گلمش و حتّى يأس و تأسّفه قاپيلمشدم. بيلمييوردم كه بو نفيم ايله

وَعَسَى اَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى اَنْ تُحِبُّوا شَيْئًا وَهُوَ شَرٌّ لَكُمْ وَاﷲُ يَعْلَمُ وَاَنْتُمْ لاَ تَعْلَمُونَ ❊ فَعَسَى اَنْ تَكْرَهُوا شَيْئًا وَيَجْعَلَ اﷲُ فِيهِ خَيْرًا كَثِيرًا

آيتلرينڭ سرّينه مظهر ايده‌جك و إلتيامى اُميد و إمكانسز گورديگم معنوى ياره‌لريمڭ تداويسنه مقتدر دوقتورلرڭ و يانلرنده‌كى قوّتلى معالجه‌نڭ أثرينى، وارلغنى و إسمِ حىّ و حكيمڭ جلوه‌سنى شفقةً گوسترمك صورتيله، بڭا منّت اوستنده منّتِ اُخروى ياپمق ايچوندر. بو ملوّث أخلاقمله بن نجى‌يم كه، بو إحسانِ عظيمه نائل اولايم دييه شاشدم. فقط لَهُ الْحَمْدُ وَ الْمِنَّة {مَنْ طَلَبَنِى وَجَدَنِى ❊ وَكَانَ بِالْمُؤْمِنِينَ رَحِيمًا ❊ يَجِدِ اﷲَ غَفُورًا رَحِيمًا} گبى إشاراتِ جليله خاطريمه گلمكله، بر درجه متسلّى اولدم

أى ياره‌مڭ دوقتورى! و أى ضلالت اوچورومنده يووارلانان روحمڭ خلاصكارى! و أى إلٰهى و قدسى يوللرڭ رهبرى!

أوّلدن هيچ معارفه‌مز يوقكن، سنى قلعه اوستنده ايلك و تصادفًا گورديگمده ”ضلالتدن خلاصڭ، اللّٰهڭ رحمتنه وصولڭ أڭ قيصه يولى وار مى؟“ دييه صوردم. ”چوق قيصه بر چارۀِ قرآنيه واردر“ دييه بيورديڭز. فقط ضلالتم، غفلتم، أنانيتم إعتباريله بو قيصه و مردانه جوابده‌كى حكمتِ عظيمه، نبعانِ رحمته دقّت ايتمدم. روحمه إهانت ايده‌رك آلديرمادم. و فلاكتِ معنويه‌ده بر مدّت داها قالمش اولدم