وقتا كه، رسالۀِ نور حتّى أنهارِ نور ديمه‌سنه شايسته اولان مكتوبلردن، ينه تصادفًا أليمه گچن بر نسخه‌يى گورونجه و مندرجاتنده‌كى حقائقه طالينجه، عنايتِ ربّانى، معجزاتِ قرآنى، همماتِ سبحانى، كراماتِ روحانى أثرى اولماليدر كه، قاسى قلبمه، عاصى روحمه، غافل عقلمه، مغرور وجدانمه، سقيم دوشونجه‌مه ”طاق“ دييه بر طوقماق وورولدى. بر إنتباه حلقه‌سى طاقيلدى. همان دوشوندم. علمانڭ مدادِ أقلامى، شهدانڭ قانندن مبجّلدر و

گبى حديثلر ايله حضرتِ عيسى‌نڭ (ع‌س) حواريّونه، حضرتِ محمّدڭ (ع‌ص‌م) أنصاره تكليفلرينى و اونلرڭ إجابتنى خاطرلادم.

عادتا فترت دورى دينمگه سزا اولان بو زمانده، إرثيتِ نبوّت مقامنده، إعلاىِ كلمة اﷲ اوغرنده مادّةً اوغراشان سَيْلِ ضلالتله قپانمش اولان راهِ حقّه چيغير آچان، بر رجلِ فداكاره إلتحاق و معاونت ايتمك و بو وسيله ايله فرصتى غنيمت بيله‌رك، ظلماتدن نوره مظهر اولمق لزومنى حسّ و إنتقال ايتدم. پك عادى بر مخلوق اولديغم و قلبمه مستولى، آغير ضلالت ضربه‌سى، قالين پرده‌سى آلتنده خسته بولونديغم ايچون، فضيلتى، معنوياتى آڭلامام. زيرا فضيلتى تقدير ايده‌بيلمك، فضيلتى بيلمكله ممكندر. يالڭز، بونجه مساوى و متردّد حركتلرمله حضورِ ساميلرينه لطفًا قبولمده، يوكسك روحڭزدن ياغان صميمى شفقت، حقيقى رأفت، حليمانه إلتفات، كريمانه حسنِ قبولڭز بنى بر طاقم اُميدلره، إختيارسز محبّتلره سَوق و بيوك سرورلره غرق ايتدى. آنجق اللّٰهڭ أڭ عاجز، أڭ آشاغى، أڭ گناهكار، أڭ ظالم بر مخلوقنى آرقداشلغنه قبول و تحمّل ايدن بر شخصيت على العاده اولامايوب، قوّتلى پشتيبانه، فتور گتورمز بر مسنده مالك اولمق لازم گلديگنى تيقّن ايده‌بيلدم.