محترم استاد! اﷲِ ذو الجلال حضرتلرينه نه قدر متشكّر بولونسه‌ڭز يريدر. عجز و فقر تذكره‌سيله گيرمگه موفّق اولديغڭز سراىِ قرآنڭ خاص خزينه‌سندن، گوزلر گورمه‌مش، قولاقلر ايشيتمه‌مش جوهرلرى گورويور و مأذون اولديغڭز مقدارينى نجم نجم چيقارتارق أوّلا كنديڭز باقييور، صوڭره ”أيّها الإنسان! ايشته باقڭز، بو مسافرخانه‌يى آچان، عالملرى رحمتيله يارادان، سزى حكمتيله خلق بيوروب بو عالمه گوندرن سلطانِ كائنات بيڭ اوچ يوز كسور سنه أوّل بيوك بر ألچيسى حبيبِ أكرمى (ع‌ص‌م) واسطه‌سيله، سزه خلقتده‌كى حكمتى، بورايه گلمكده‌كى مقصدى، عبوديتڭ إقتضا ايتديگى خدمتى إلخ.. بيلديرمشدى. بو عالى تبليغاتى، او قدسى أحكامى سزڭ آڭلايه‌جغڭز لسانله آڭلاتييورم، ديڭله‌يڭز. أگر عقلڭز وارسه، گوزيڭز گورييورسه، إنسانلغڭز وارسه، حقيقتى آڭلار و ايمانه گليرسڭز.“ دييه بياناتده بولونويورسڭز. بزلر حَسْبَ الْقدر فَلِلّٰهِ الْحَمْدُ بو قدسى بياناتى ياقيندن ديڭله‌مك، گورمك و گوسترمك اشتياقنى گوستردك. سز ده او ألماسلرى گوستروب بزى اويانديرديڭز. حقيقتى آڭلاتوب، يولمزى طوغرولتمغه وسيله اولديڭز. اﷲ سزدن أبدًا راضى اولسون. نفسِ أمّاره‌نڭ زبونى، جنّ و إنس شيطانلرينڭ هدفى اولمقدن قورتولامادق ايسه ده، بو حسبى و قرآنى خدمتدن ذوق آلييورز، لايقيله ياپامييورسه‌ق ده يولنده بولونويورز. {اِنَّمَا اْلاَعْمَالُ بِالنِّيَّاتِ}