أنوارِ قرآنيه ميزان و برهانلرندن و قيمتى تقدير ايديله‌مه‌ين سوزلر نامنده‌كى رسالۀِ شريفه‌لر فقيرى إحيا ايدييور، قلبمى نورلانديرييور. {هٰذَا مِنْ فَضْلِ رَبِّى} چوقدن بَرى آرامقده ايكن لَهُ الْحَمْدُ جنابِ حق سوزلرى بو فقيره إحسان بيوردى. قلب و گوڭلمه عاجز قلمم و قالم ترجمان اولامييور.

بختيار قارداشم خسرو!

شو رساله (❊)، بر مجلسِ نورانيدر كه، قرآنڭ شو منوّر، مبارك شاكردلرى، ايچنده بربريله معنًا مذاكره و مداولۀِ أفكار ايدييورلر. و يوكسك بر مدرسه صالونيدر كه، قرآنڭ شاكردلرى اونده هر برى آلديغى درسى آرقداشلرينه سويله‌يور. و قرآنِ معجز البيانڭ خزينۀِ قدسيه‌سنڭ صندوقچه‌لرى اولان رساله‌لرڭ صاتيجى و دلاّللرينه محتشم و مزيَّن بر دكّان و بر منزلدر. هر برى آلديغى قيمتدار مجوهراتى بربرينه و مشتريلرينه اوراده گوسترييور. بارك اﷲ، سن ده او منزلى چوق گوزل سوسلنديرمشسڭ.