ذكى دوستم! قلب چوق آرزو ايدردى؛ أهلِ فندن أنوارِ ايمانيه‌يه و أسرارِ قرآنيه‌يه إشتياق درجه‌سنده إحتياجنى حسّ ايتمك جهتنده خلوصى بگه بڭزه‌يه‌جك آدملر ايلرى آتيلسين. هم مادام سوزلر سنڭ وجدانڭله قونوشه‌بيليرلر. هر بر سوزى، شخصمدن دگل بلكه قرآنڭ دلاّلندن سڭا بر مكتوبدر و أجزاخانۀِ قدسيۀِ قرآنيه‌دن برر رچته‌در فرض ايت. غيبوبت ايچنده حاضرانه بر مصاحبه دائره‌سنى اونلر ايله آچ. هم آرزو ايتديگڭ وقت بڭا مكتوب ياز. بن جواب يازماسه‌م ده گوجنمه. چونكه أسكيدن بَرى مكتوبلرى پك آز يازارم. حتّى اوچ سنه‌در قارداشمڭ چوق مكتوبلرينه قارشى بر تك يازدم.

أيّها الاستاد الأعظم!

بِالخاصّه دست و دامنِ مباركلريڭزى بوس ايدوب، هر آن و زمان محتاج بولونديغم دعواتِ استادانه‌لرينى نياز أيلرم. بر هفته أوّل سليمان أفندى قارداشم واسطه‌سيله إرسال بويوريلان أنواعِ إلتفاتى شامل لطفنامۀِ أكرميلرينى، كمالِ مسرّتله آلارق مفتخرتله اوقودم. بر فقره‌سنده توافقاتِ غيبيه حقّنده‌كى قناعتِ عاجزانه‌م سؤال بيورلييور. ”نعم صدقت، أيّها الاستاد المحترم“ كلمه‌لريله إجابت ايدييورم. زيرا شو توافقاتِ غيبيۀِ عجيبه، بِالعموم بحرِ محيطِ نورڭ طلبه‌لرينى و حتّى طلبه‌لرڭ جماعتِ مستمعه‌لرينى مست و حيران و مديونِ سجدۀِ شكران بيراقمشدر. نورلرڭ شو معجزنما كرامتلرينى، آنجق و آنجق مرآتِ محمّديه (ع‌ص‌م) ايله مشاهده ايده‌بيليرز. بو حقيقتڭ ديگر بر معرفتى اولان