مساعدۀِ فاضلانه‌لريله‌ بر معروضاتم داها وار. فقط بو جهتده، شخصمى إستثنا ايده‌رك مراممى عرض ايده‌جگم. بنده‌ڭز نورلرڭ مشتاق مشتريلرنده داها طوغريسى يانيق طلبه‌لرنده، بر توافقِ فوق العاده گورويورم. چونكه أنانيت و نفسانيتڭ شدّتله حكمفرما اولديغى شو عصرده، هپسنڭ درجۀِ إحتياج و إشتياقى بر، كافّه‌سنڭ أخلاق و أطوارى بر، عمومنڭ طرزِ تلقّيسى بر و يكديگرينه قارشى (أخِ لأب و اُمّدن) داها قوى بر رابطۀِ حقيقيه ايله مربوط، صميميت و حقيقت‌پرورلكده، عادتا يكديگرينه مسابقه ايدر درجه‌ده جدّى و خالص، قارداشلقده تعقيب ايتدكلرى خطّ و حركت بر و داها پك زياده بربرينه بڭزه‌ين طلاّبِ نورانيه‌نڭ بو خارقه حاللرينى ده آيريجه بر توافقاتِ غيبيه صيره‌سنده گورويورم. زيرا إستانبولدن، إزميردن، آيديندن، كوتاهيه‌دن، إسپارطه‌دن، أگيرديردن إلخ.. مختلف بلده‌لردن سچيلوب، هر صنفده مقيّد بولونان طلبه‌لرڭ عين خاصّه‌لرى حائز اولمالرى، جالبِ نظرِ دقّت اولسه گركدر، ظن ايدرم أفنديم حضرتلرى.

لطفكار و عنايتكار استادم أفنديم حضرتلرى!

رمضانِ شريفڭ اوننجى جمعه ايرتسى گونى، ساعت اون بر بچقده، هر بر نكته‌سى نامتناهى حكمت و حقيقت مژده‌لرينى حاوى و مبشّر، طوقوز نكته‌لى رمضانيه‌يى آلدم. روحمڭ فوق العاده محتاج و مشتاق بولونديغى و نظيرسز أثرِ پرنورى، او گيجه كمالِ فخر و سرورله يازدم. و أصلنى ينه نيسلى حافظ محمود أفندى‌يه تسليم ايتدم، حقّى أفندى‌يه گوتوردى. ايرتسى صباح إستنساخ ايتديگم رساله‌يى بر داها دقّتلى اوقويه‌رق، خطّمڭ توافقنى تصحيح و على أفندى‌يه عائد بر مكتوب يازدم. تام إمضا ايده‌جگم أثناده، إسلام‌كويندن بو وظيفه‌يه معنًا مأمور بر آدم گلدى، على أفندى‌يه گوندردم. و شو اميدڭ فوقنده آنى اولارق گلن واسطۀِ إرسال، أثرڭ قدسيتنه صريح و بارز بر دليل اولديغنه شبهه قالمادى