(نور رساله‌لرينه چوق مشتاق و اونلرڭ مطالعه‌سندن إنتباهه دوشن بر دوقتوره يازيلان مكتوبدر. بو اوچنجى ذيله چندان مناسبتى آزدر، فقط قارداشلريمڭ فقره‌لرى ايچنده بو ده بنم بر فقره‌م اولسون.)

مرحبا أى كندى خسته‌لغنى تشخيص ايده‌بيلن بختيار دوقتور، صميمى و عزيز دوستم!

سنڭ حرارتلى مكتوبڭڭ گوسترديگى إنتباهِ روحى شايانِ تبريكدر. بيليڭز كه موجودات ايچنده أڭ قيمتدار، حياتدر. و وظيفه‌لر ايچنده أڭ قيمتدار، حياته خدمتدر. و خدماتِ حياتيه ايچنده أڭ قيمتدارى، حياتِ فانيه‌نڭ حياتِ باقيه‌يه إنقلاب ايتمه‌سى ايچون سعى ايتمكدر. شو حياتڭ بتون قيمتى و أهمّيتى ايسه حياتِ باقيه‌يه چكردك و مبدأ و منشأ اولماسى جهتنده‌در. يوقسه حياتِ أبديه‌يى زهرله‌يه‌جك و بوزاجق بر طرزده شو حياتِ فانيه‌يه حصرِ نظر ايتمك؛ آنى بر شمشگى، سرمدى بر گونشه ترجيح ايتمك گبى بر ديوانه‌لكدر.

حقيقت نظرنده هركسدن زياده خسته اولان، مادّى و غافل دوقتورلردر. أگر أجزاخانۀِ قدسيۀِ قرآنيه‌دن ترياق‌مثال ايمانى علاجلرى آلابيلسه‌لر، هم كندى خسته‌لقلرينى، هم بشريتڭ ياره‌لرينى تداوى ايدرلر، إن شاء اﷲ. سنڭ شو إنتباهڭ سنڭ ياره‌ڭه بر مرهم اولديغى گبى، سنى دخى دوقتورلرڭ مرضنه بر علاج ياپار. هم بيليرسڭ، مأيوس و اميدسز بر خسته‌يه معنوى بر تسلّى، بعضًا بيڭ علاجدن داها زياده نافعدر. حالبوكه طبيعت باتاقلغنده بوغولمش بر طبيب، او بيچاره مريضڭ أليم يأسنه بر ظلمت داها قاتار. إن شاء اﷲ بو إنتباهڭ سنى اويله بيچاره‌لره مدارِ تسلّى ايدر، نورلى بر طبيب ياپار. بيليرسڭ كه؛ عمر قيصه‌در، لزوملى ايشلر پك چوقدر. عجبا بنم گبى سن دخى قفاڭى تفتيش ايتسه‌ڭ، معلوماتڭ ايچنده نه قدر لزومسز، فائده‌سز، أهمّيتسز، اودون ييغينلرى گبى جامد شيلرى بولورسڭ. چونكه بن تفتيش ايتدم، چوق لزومسز شيلرى بولدم. ايشته او فنّى معلوماتى، او فلسفى معارفى؛ فائده‌لى، نورلى، روحلى ياپمق چاره‌سنى آرامق لازمدر. سن دخى جنابِ حقدن بر إنتباه ايسته كه، سنڭ فكريڭى حكيمِ ذو الجلالڭ حسابنه چويرسين، تا او اودونلره بر آتش ويروب نورلانديرسين. لزومسز معارفِ فنّيه‌‌ڭ، قيمتدار معارفِ إلٰهيه حكمنه گچسين