بريسى: خطيب محمد (رحمة اﷲ عليه) نامنده جدّى بر إختيار طلبه، إختيارلر رساله‌سنى يازييوردى. تا اونبرنجى رجانڭ آخرلرنده و مرحوم عبد الرحمانڭ وفاتنڭ تام مقابلنده، قلمى ”لاَ إِلٰهَ إلاَّ هُوَ“ يازوب و لسانى دخى ”لاَ إِلٰهَ إلاَّ اﷲُ“ دييه‌رك حسنِ خاتمه‌نڭ خاتميله صحيفۀِ حياتنى مهرله‌يوب، رسالة النور طلبه‌لرينڭ ايمانله قبره گيره‌جكلرينه دائر اولان إشارى بشارتِ قرآنيه‌يى وفاتيله إمضا ايتمش. (رحمة اﷲ عليه رحمةً واسعةً.)
    ايكنجيسى: سزڭ تأليفڭز اولان فهرسته‌نڭ تصحيحنده، بر مستنسخڭ نقصان بيراقديغى بر صحيفه‌يى، تحسينه ديدم: ”ياز!“ او ده يازمغه باشلادى. سيم سياه بر مركّبدن و تميز قلم ايله بردن يازديغڭز ايكنجى جلد فهرسته‌نڭ مقبوليتنه حجّت اولارق او سياه مركّب گوزل بر قيرمزى صورتنى آلدى. تا ياريم صحيفه قدر بو غريب حادثه‌يه تعجّب ايدوب باقاركن، او مركّب سيم سياهه دوندى. صحيفه‌‌نڭ اوته‌كى ياريسى، عين قلم، عين حقّه تام سياه يازيلدى. بر زمان بارلاده، باغلرده‌كى كوشكده، شاملى، مسعود و سليمانڭ مشاهده‌سيله عين حادثه‌يى باشقه شكلده گوردك. شويله كه:
    بن، سه‌ومه‌ديگم ايچون سياه بر مركّبى قسمًا دوكدم؛ بردن متباقيسى چوق بگنديگم گوزل بر قيرمزى‌يه تحوّل ايتدى. رسالة النورڭ كاتبلرينى شوقلنديردى. گوزمزه سلسلۀِ كرامتڭ بر اوجنى و بر ترشّحنى گوستردى.
* * *
آخرت قارداشلريمه مهم بر إخطار  ”ايكى مادّه“در:
    برنجيسى: رسالۀِ النوره إنتساب ايدن ذاتڭ أڭ أهمّيتلى وظيفه‌سى، اونى يازمق ويا يازديرمقدر و إنتشارينه يارديم ايتمكدر. اونى يازان ويا يازديران، رسالۀِ النور طلبه‌سى عنواننى آلير. و او عنوان آلتنده، هر يگرمى درت ساعتده بنم لسانمله بلكه يوز دفعه، بعضًا داها زياده خيرلى دعالرمده و معنوى قزانجلرمده حصّه‌دار اولمقله برابر؛ بنم گبى دعا ايدن قيمتدار بيڭلر قارداشلرڭ و رسالۀِ النور طلبه‌لرينڭ دعالرينه و قزانجلرينه دخى حصّه‌دار اولور.