بِسْمِ اﷲِ الرَّحْمٰنِ الرَّحِيمِ     اَلْحَمْدُ ِﷲِ رَبِّ الْعَالَمِينَ
وَالصَّلاَةُ وَالسَّلاَمُ عَلٰى سَيِّدِ الْمُرْسَلِينَ وَ عَلٰى اٰلِهِ وَ صَحْبِهِ اَجْمَعِينَ
توحيدڭ ايكى برهانِ معظّمى
و سورۀِ إخلاصڭ بر نكتۀِ إعجازيه‌سى
شو كائنات تماميله بر برهانِ معظّمدر. لسانِ غيب، شهادتله مسبّحدر، موحّددر. أوت توحيدِ رحمانله، بيوك بر سسله ذاكردر كه: {لاَ إِلٰهَ إِلاَّ هُوَ}
بتون ذرّات حجيراتى، بتون أركان و أعضاسى برر لسانِ ذاكردر؛ او بيوك سسله برابر دير كه: {لاَ إِلٰهَ إِلاَّ هُوَ}
او ديللرده تنوّع وار، او سسلرده مراتب وار. فقط بر نقطه‌ده طوپلار، اونڭ ذكرى، اونڭ صوتى كه: {لاَ إِلٰهَ إِلاَّ هُوَ}
بو بر إنسانِ أكبردر، بيوك سسله ايدر ذكرى؛ بتون أجزاسى، ذرّاتى، كوچوجك سسلريله، او بلند سسله برابر دير كه: {لاَ إِلٰهَ إِلاَّ هُوَ}
شو عالم حلقۀِ ذكرى ايچنده اوقويور عشرى، شو قرآن مشرقِ نورى. بتون ذى روح ايدر فكرى كه: {لاَ إِلٰهَ إِلاَّ هُوَ}
بو فرقانِ جليل الشّان، او توحيده ناطق برهان، بتون آيات صادق لسان. شعاعاتِ بارقۀِ ايمان. برابر دير كه: {لاَ إِلٰهَ إِلاَّ هُوَ}
قولاغى گر ياپيشديرسه‌ڭ شو فرقانڭ سينه‌سنه، دريندن تا درينه، صريحًا ايشيديرسڭ سماوى بر صدا دير كه: {لاَ إِلٰهَ إِلاَّ هُوَ}
او سسدر غايتًا علوى، نهايت درجه جدّى، حقيقى پك صميمى، هم نهايت مونس و مقنع و برهانله مجهّزدر. مكرّر دير كه: {لاَ إِلٰهَ إِلاَّ هُوَ}
شو برهانِ منوّرده، جهاتِ ستّه‌سى شفّاف كه، اوستنده منقّشدر مزهّر سكّۀِ إعجاز، ايچنده پارلايان نورِ هدايت دير كه: {لاَ إِلٰهَ إِلاَّ هُوَ}