بِاسْمِهِ سُبْحَانَهُ ❊ اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    عزيز، صدّيق قارداشلرم!
    بو پارچه هم لاحقه‌يه، هم إعجازِ قرآنڭ آخرينه يازيلاجق. بر قاچ گون صوڭره أهمّيتلى بر پارچه‌يى ده گوندره‌جگز.
    مبارك رمضانڭ ليلۀِ قدر سرّيله، سكسان اوچ سنه بر عمرِ معنوى قزانديرماسى سرِّ حكمتيله و رسالۀِ النورڭ شاكردلرنده‌كى سرِّ إخلاصله تساند و إشتراكِ أعمالِِ اُخروى دستوريله هر بر صادق شاكرد، او فوق العاده معنوى قزانجى ألده ايده‌جگنه غايت قوّتلى بر دليلى بودر كه: بو دائره ايچنده قرق بيڭ، بلكه يوز بيڭ خالص، حقيقى مؤمنلرڭ ايچنده حقيقتِ ليلۀِ قدرى ألده ايده‌جك بر ايكى، اون يگرمى دگل، بلكه يوزلرڭ ألده ايتمه‌سى إحتمالى قويدر.
    سرِّ إخلاصله و إشتراكِ أعمالِِ اُخروى دستورينڭ سرّيله بز و سز بو حقيقته متوجّهًا، بو رمضانِ شريفده هر بريمز عمومڭ حسابنه و عموم آرقداشلرى ايچنده كندينى فرض ايدوب، نُونِ متكلّمِ مع الغير، يعنى دائما
اَجِرْنَا اِرْحَمْنَا وَاغْفِرْلَنَا وَوَفِّقْنَا وَاهْدِنَا
وَاجْعَلْ لَيْلَةَ الْقَدْرِ فِى هٰذَا الرَّمَضَانَ خَيْرًا فِى حَقِّنَا مِنْ اَلْفِ شَهْرٍ
گبى كلمه‌لرده (نَا) ايچنده عموم قارداشلرينى نيت ايتمكدر. و بِالخاصّه أڭ ضعيف اولان بو قارداشڭزى، آغير وظيفه‌سنده او خصوصى نيتله يارديم ايتمكدر.
* * *
    عزيز، صدّيق قارداشلرم!
    هم سزى، هم بزى، هم رسالۀِ النور دائره‌سنى و خصوصًا قهرمان طاهرى، بو ورد الأعظمِ قرآنينڭ بو طرزده ظهوره گلمسيله تبريك ايدييورز. أوت بونڭ طبعنده ايكى أمرِ عظيم وار: