شيمديدن، بوراده‌كى رسالۀِ النور شاكردلرى نامنه اوڭا بيڭلر تشكّر و او خدمتده اونى تبريك ايدييورز. و اونڭ كرامتلى قلمى، جاذبه‌دار أسرارِ توافقيه‌دن يوزينى چويروب طوغريدن طوغرى‌يه رسالۀِ النورڭ نشرينه صاريلماسى، بزى چوق منّتدار و مسرور أيلدى. جنابِ حق اونڭ گبى خالص، مخلص طلبه‌لرى چوغالتسين، آمين.
    مكتوبلريڭزده آرا صيره صدّيق سليمانڭ، أسكى زمانده حرارتلى صداقتى و علاقه‌دارلغى و قوّتلى شاكردلگى ايله بحثى گچييور. بن ئولونجه‌يه قدر اونڭ صداقتى و سلامتِ قلبنى و بڭا و رسالۀِ النوره خالصانه خدمتنى اونوتامييورم.
* * *
    عزيز، صدّيق، خالص، مخلص قارداشلرم و خدمتِ قرآنيه‌ده جدّى، حقيقى آرقداشلرم!
    بو ياقىنده هم إسپارطه‌ده، هم بو حواليده رسالۀِ النورڭ إخلاص لمعه‌لرى إنتشاره باشلاديغى مناسبتيله و بر ايكى كوچك حادثه جهتيله شدّتلى بر إخطار قلبه گلدى. ريايه دائر اوچ نقطه يازيلاجق:
    برنجيسى: فرض و واجبلرده و شعائرِ إسلاميه‌ده و سنّتِ سنيه‌نڭ إتّباعنده و حراملرڭ تركنده ريا گيره‌مز. إظهارى ريا اولاماز. مگر غايت ضعفِ ايمانله برابر، فطرةً رياكار اوله. بلكه شعائرِ إسلاميه‌يه تماس ايدن عبادتلرڭ إظهارلرى، إخفاسندن چوق درجه داها ثوابلى اولديغنى، حجّة الإسلام إمامِ غزالى (رض) گبى ذاتلر بيان ايدييورلر. سائر نوافلڭ إخفاسى چوق ثوابلى اولديغى حالده؛ شعائره تماس ايدن، خصوصًا بويله بدعه‌لر زماننده إتّباعِ سنّتڭ شرافتنى گوسترن و بويله بيوك كبائر ايچنده حراملرڭ تركنده‌كى تقوايى إظهار ايتمك، دگل ريا بلكه إخفاسندن پك چوق درجه داها ثوابلى و خالصدر.