چونكه او زمانده حربِ عمومينڭ مبدألرنده، استادم أسكى عادتنى وسائر علومِ فلسفه‌يى و علومِ عاليه‌ىى بيراقوب، تام بر إنشراحِ صدرله رسالۀِ النورڭ فاتحه‌سى و برنجى مرتبه‌سى اولان إشارات الإعجاز تفسيرينه باشلايوب، بتون همّتنى، أفكارينى قرآنه صرف ايتمگه باشلاديغنه توافقى قوى بر أماره‌در كه؛ بو عصرده او كلّى معناىِ إشاريده مدارِ نظر بر فردى، رسالۀِ النورڭ ترجمانى و شاكردلرينڭ شخصِ معنويسنى تمثيل ايدن ممثّليدر.
    أوت مادام قرآنِ معجز البيان هر عصرده هر فرده خطاب ايدر بر علمِ محيط و بر إرادۀِ شامله ايله هر شيئه باقه‌بيلير؛ و مادام علماءِ إسلامڭ إتّفاقيله، آيتلرڭ معناىِ صريحندن باشقه إشارى و رمزى و ضمنى متعدّد طبقه‌لرده معنالرى واردر.
    و مادام {يَا اَيُّهَا الَّذِينَ اٰمَنُوا} گبى خطابلرده هر عصر گبى، بو عصرده‌كى أهلِ ايمان، عصرِ سعادتده‌كى مؤمنلر گبى داخلدر.
    و مادام إسلاميت نقطه‌سنده بو عصر، غايت أهمّيتلى و دهشتليدر. قرآن و حديث إخبارِ غيبى ايله، أهلِ ايمانى اونڭ فتنه‌سندن صاقينمق ايچون شدّتله خبر ويرمش.
    و مادام حسابِ جفرى و أبجدى و رياضى، أسكيدن بَرى صاغلام بر دستوردر و قوّتلى بر أماره اولابيلير.
    و مادام رسالۀِ النور و ترجمانى و شاكردلرى، ايمان و قرآن خدمتنده پارلاق و تأثيرلى وظيفه‌لرى غايت أهمّيت كسب ايتمشدر.
    و مادام بو بيوك آيت، حسابِ جفرله بو عصره و ايكى حربِ عمومى‌يه باقار. أسكى حربڭ پاطلاماسنه و رسالۀِ النورڭ ظهورينه توافق ايتديگى گبى، معنًا ده گوسترر. ألبته مذكور حقيقتلره و قوّتلى قرينه‌لره بناءً بِلا تردّد حكم ايدرز كه: رسالۀِ النورڭ شخصِ معنويسى و ترجمانى، بو آيتِ عظيمه‌نڭ معناىِ إشارى طبقه‌سنڭ كلّيتنده داخل و مدارِ نظر بر فرديدر. و بو آيت اوڭا إشارت ايدر. و معناىِ رمزيله اوندن ده خبر ويرر. و إخبارِ غيب نوعندن بر لمعۀِ إعجازيه‌يى گوسترر، دينله‌بيلير و ديرز.
    تحليل: بر (ش) ايكى (ر) يدى يوز. (ف م ن ل) ايكى يوز. (ص د هـ ا) يوز. (س م) يوز. إسمِ جلال آلتمش يدى. ايكى (ل) آلتمش. (فَهُوَ) طقسان بر. (لِْلاِسْلاَمِ)ده‌كى ايكى ويا اوچ (ألف)، ايكى ويا اوچ. (ح) سكز. (نُورٍ مِنْ رَبِّهِ)، (رسالۀِ النور) هر ايكيسنده نُور وار. (رساله)ده (ر)، (رَبِّه)ده‌كى (ر)يه مقابلدر. أگر (نُورٍ)ده‌كى (تنوين) صاييلسه، (النُّور)ده دخى شدّه‌لى (ن) صاييلير، ينه إتّحاد ايدرلر. (نُورٍ)دن باشقه (مِنْ بِهِ) طقسان يدى ايده‌رك، رسالۀِ النورده قالان (هـ ل س) ايكى (ألف) دخى طقسان يدى ايده‌رك، تام توافق ايدر. توركجه تلفّظده رسالۀِ النور همزه ايله اوقونماسى ضرر ويرمز.