أوت بو زمان هم ايمان و دين ايچون، هم حياتِ إجتماعيه و شريعت ايچون، هم حقوقِ عامّه و سياستِ إسلاميه ايچون، غايت أهمّيتلى برر مجدّد ايستر. فقط أڭ أهمّيتليسى، حقائقِ ايمانيه‌يى محافظه نقطه‌سنده تجديد وظيفه‌سى، أڭ مقدّس و أڭ بيوگيدر. شريعت و حياتِ إجتماعيه و سياسيه دائره‌لرى اوڭا نسبةً ايكنجى، اوچنجى، دردنجى درجه‌ده قالييور.
    رواياتِ حديثيه‌ده، تجديدِ دين حقّنده زياده أهمّيت ايسه، ايمانى حقائقده‌كى تجديد إعتباريله‌در. فقط أفكارِ عامّه‌ده، حيات‌پرست إنسانلرڭ نظرنده ظاهرًا گنيش و حاكميت نقطه‌سنده جاذبه‌دار اولان حياتِ إجتماعيۀِ إسلاميه و سياستِ دينيه جهتلرى داها زياده أهمّيتلى گورونديگى ايچون، او عدسه ايله او نقطۀِ نظردن باقييورلر، معنا ويرييورلر.
    هم بو اوچ وظائفى بردن بر شخصده، ياخود جماعتده، بو زمانده بولنماسى و مكمّل اولماسى و بربرينى جرح ايتمه‌مسى پك اوزاق، عادتا قابل گورولميور. آخر زمانده، آلِ بيتِ نبوينڭ (ع‌ص‌م) جماعتِ نورانيه‌سنى تمثيل ايدن حضرتِ مهديده و جماعتنده‌كى شخصِ معنويده آنجق إجتماع ايده‌بيلير. بو عصرده، جنابِ حقّه حدسز شكر اولسون كه، رسالۀِ النورڭ حقيقتنه و شاكردلرينڭ شخصِ معنويسنه، حقائقِ ايمانيه محافظه‌سنده تجديد وظيفه‌سنى ياپديرمش. يگرمى سنه‌دن بَرى او وظيفۀِ قدسيه‌ده تأثيرلى و فاتحانه نشريله غايت دهشتلى و قوّتلى زندقه و ضلالت هجومنه قارشى تام مقابله ايدوب، يوز بيڭلر أهلِ ايمانڭ ايمانلرينى قورتارديغنى قرق بيڭلر آدم شهادت ايدر.
    امّا بنم گبى عاجز و ضعيف بر بيچاره‌نڭ، بويله بيڭلر درجه حدّمدن فضله بر يوكى يوكله‌مك طرزنده، شخصمى مدارِ نظر ايتمه‌ملى دييور و سزه سلام ايدييور. بز ده ذاتڭزه و اوراده‌كى رسالۀِ النورله علاقه‌دار اولانلره سلام ايدييورز.
رسالۀِ النور شاكردلرندن
أمين، فيضى، كامل