سورۀِ مائده‌نڭ اون دردنجى آيتى
                {قَدْ جَاءَكُمْ مِنَ اﷲِ نُورٌ وَكِتَابٌ مُبِينٌ ❊ يَهْدِى بِهِ اﷲُ}
    سورۀِ نسانڭ آخرنده
    {يَا اَيُّهَا النَّاسُ قَدْ جَاءَكُمْ بُرْهَانٌ مِنْ رَبِّكُمْ وَاَنْزَلْنَا اِلَيْكُمْ نُورًا مُبِينًا}
          آيتى گبى، رسالۀِ النور معنا و جفر جهتيله، معناىِ إشارى أفرادندن اولديغنه قوّتلى بر قرينه بولدم.
    ايكنجى آيت اولان سورۀِ نساء آيتى، برنجى شعاع اولان إشاراتِ قرآنيه‌ده، استادم إشارتنى بيان ايتمش. برنجى آيت اولان سورۀِ مائده‌نڭ اون دردنجى آيتى هم بونڭ إشارتنى تأييد ايدييور، هم ده {اَفَمَنْ شَرَحَ اﷲُ} آيتنڭ إشاراتنى تصديق ايدييور.
    أوت بو عصرده معناىِ إشارى طبقه‌سندن تام بو آيتڭ قدسى مفهومنه بر فرد، رسالۀِ النور اولديغنه كيم إنصاف ايله باقسه تصديق ايده‌جك.
    مادام رسالۀِ النور بر فردى اولديغنه معنوى مناسبت قويدر. مادام بو آيتڭ مقامِ جفريسى بيڭ اوچ يوز آلتمش آلتيدر (١٣٦٦)، أگر مدّه‌لر و اوقونميان همزه‌لر صاييلمازسه آلتمش ايكيدر (١٣٦٢). و مادام رسالۀِ النور، قرآنِ مبين نورينى و هدايتنى نشر ايدن بر كتابِ مبيندر. و مادام ظاهرًا اوندن داها ايلرى، او وظيفه‌يى آغير شرائط آلتنده ياپانلرى گورمييورز. و مادام آيتلر، سائر كلاملر گبى جزئى بر معنايه منحصر اولاماز. و مادام دلالتِ ضمنى و إشارى ايله قاعدةً مفهومِ كلامده داخل اولويور. و مادام نجم الدّينِ كبرا و محيى الدينِ عربى (رض) گبى پك چوق أهلِ ولايت، معناىِ ظاهريدن باشقه باطنى و إشارى معنالر ايله أكثر آياتى تفسير ايتمشلر؛ حتّى تفسيرلرنده موسى (ع‌س) و فرعوندن مراد، قلب و نفسدر ديدكلرى حالده اُمّت اونلره ايليشمه‌مش؛ بيوك علمادن چوقلرى اونلرى تصديق ايتمشلر. ألبته آيتڭ دلالتِ ضمنيه ايله رسالۀِ النوره قوّتلى قرينه‌لر ايله إشارتى قطعيدر، شبهه ايديلمه‌مك گركدر.